नेपालमा बुस्टर खोप लगाउने करिब सात लाख पुगे

फाइल तस्बिर

काठमाडौँ- नेपालमा कोभिड-१९ विरुद्धको बुस्टर खोप लगाउनेको संख्या ६ लाख ७२ हजार ५४८ पुगेको छ । सरकारले कोभिडको तेस्रो लहर सुरु भएदेखि फ्रन्टलाइनरको रुपमा कार्यरत र ज्येष्‍ठ नागरिलाई केही समय अघिदेखि अतिरिक्त खोप दिन थालेको हो ।

कोभिड विरुद्धको पूरा मात्रा खोप लगाएको ६ महिना भएका १८ वर्षमाथिका सबैलाई बुस्टर डोज दिने निर्णय गरिसकेको छ । पूर्ण मात्रा खोप १ करोड ६० लाख ७१ हजार २२६ जनाले लगाइसकेका छन् । पहिलो मात्रा १ करोड ८० लाख ८१ हजार ८२७ जनाले पाइसकेको स्वास्थ्य तथा जनसंख्या मन्त्रालयले जनाएको छ ।

कुल जनसंख्याको पहिलो मात्रा ७१ दशमलव १ प्रतिशत र पूर्णा मात्रा ५५ दशमलव १ प्रतिशतले पाएका छन् । १८ वर्ष माथिका लक्षित जनसंख्याको ८९ दशमलव २ प्रतिशत र पूर्ण मात्रा ७३ दशमलव ८ प्रतिशतले पाइसकेका छन् । त्यसैगरी लक्षित जनसंख्याको १२ देखि १७ वर्षसम्मका ८४ प्रतिशतले पाएका छन् । पूर्ण मात्रा ३८ प्रतिशतले लगाइसकेका छन् ।

नेपालले विभिन्न मुलुकबाट गरेर ४ करोड ६५ लाख ७० हजार ७२० डोज प्राप्‍त गरेको छ । गत वर्षको माघको दोस्रो सातादेखि खोप अभियान सुरु भएको थियो । भारतले अनुदानमा १० लाख कोभिशिल्ड खोप उपलब्ध गराएको थियो । फ्रन्टलाइनरको रुपमा काम गर्नेले खोप पाएका थिए । सरकारले कोभिशिल्ड, भेरोसेल, जोनसन एण्ड जोनसन, मोर्डना र फाइजर खोप लगाउँदै आएको छ ।