डोटीमा किशोर मृत भेटिएपछि स्थानीय बासिन्दाद्वारा राजमार्ग अवरुद्ध

फाइल फोटो

डोटी – जोरायल गाउँपालिका– १ गोगनपानीमा एक किशाेर मृत अवस्थामा फेला परेका छन् । विवाहबाट घर फर्किरहेका डडेल्धुराको आलिताल गाउँपालिका–१ भुसुका १६ वर्षीय किशाेर भानु नाथ मृत्तावस्थामा फेला परेको प्रहरीले जनाएको छ । 

यही माघ २३ गते राति बिहेमा गएका नाथ गोगनपानी सडक नजिकै मृत अवस्थामा भेटिएका र घटनाबारे जानकारी पाएपछि जिल्ला प्रहरी कार्यालयको टोली घटनास्थलतर्फ गएको सह–प्रवक्ता रवीन्द्र चन्दले जानकारी दिए ।

किशाेर मृत अवस्थामा भेटिएपछि स्थानीयवासीले अहिले अत्तरिया-स्याउले जोड्ने भीमदत्त राजमार्ग अवरुद्ध पारेका छन् । उक्त घटनाको छानबिन गर्न भन्दै राजमार्ग बन्द गरिएको स्थानीयवासी कमलबहादुर डाँगीले जानकारी दिए । राजमार्ग अवरुद्ध हुँदा लामो तथा छोटो दूरीका दजर्नौँ यातायातका साधन गोगनपानीमा जाममा परेका छन् ।