रोकिएन सेयर बजारको उकालो यात्रा, ३.७ अंकले बढेर २२३९.४२ बिन्दूमा

काठमाडौं : पछिल्लो समय उकालो लागिरहेको सेयर बजारले सोमबार पनि निरन्तरता पाएको छ । सेयर बजार सूचक नेप्से सामान्य अंकले बढेको हो । सोमबारको कारोबारमा नेप्से ३ दशमलव ७ अंकले बढेर २२३९ दशमलव ४२ बिन्दूमा पुगेको छ ।

प्री ओपन सेसनमा उच्चतम् बिन्दूमा पुगेको नेप्से क्रमश: ओरालो लागेको थियो । अन्तरदिवसीय कारोबारमा सामान्य उतारचढाव पार गर्दै अन्तत: ३ अंकको सामान्य वृद्धिमा रोकिएको छ । कारोबारको अन्तिम १ घन्टामा ओरालो लागेको नेप्से सामान्य वृद्धि भएर टुंगिएको थियो ।

झन्डै करेक्सनको बाटोमा पुगेको नेप्सेलाई उकालो यात्रामा पुर्‍याउन विकास बैंक, जीवन बीमा र निर्जीवन बीमा कम्पनीका सेयरहरूले मद्दत पुर्‍याए । यसबीच विकास बैंकहरूको सेयर परिसूचक १ दशमलव ७५ प्रतिशतले बढ्यो ।

समग्र नेप्से परिसूचककै ग्राफमा उतारचढाव देखिएको बैंकिङ समूहमा ० दशमलव १७ प्रतिशतले वृद्धि भयो । ट्रेडिङ, होटल, उत्पादनमुलक क्षेत्र, माइक्रोफाइनान्स र अन्य समूहको परिसूचक घट्यो ।

आइतबार जस्तै आरम्भ चौतारी, प्रभु लाइफ इन्स्यवरेन्स, नारायणी डेभलपमेन्ट बैंक, युनाइटेड फाइनान्स, कर्पोरेट डेभलपन्ट बैंकका सेयरमा उच्च मूल्यवृद्धि भएको छ । आइतबार ६ अर्ब भन्दा बढी कारोबार भएकोमा सोमबार भने कारोबार घटेको छ । आज करिब पाँच अर्ब ५२ करोड रुपैयाँ बराबर कारोबार भएको छ ।