जनवरीमा नेपाल आउने पर्यटकको संख्या दोब्बरले बढ्यो

फोटो : हिमालयन ट्रेल्स एडभेन्चर ट्राभल/फेसबुक

काठमाडौँ : सन् २०२२ को जनवरी महिनामा गएको वर्षभन्दा दोब्बरले नेपालमा पर्यटक भित्रिएका छन् । नेपाल पर्यटन बोर्डले सार्वजनिक गरेको तथ्यांकअनुसार सन् २०२१ को जनवरी महिनाभन्दा सन् २०२२ को जनवरी महिनामा दोब्बरले नेपाल घुम्न विदेशी पर्यटक आएका हुन् ।

गएको वर्ष जनवरी महिनामा मात्रै ८ हजार ८ सय ७४ जना पर्यटक नेपाल आएका थिए । तर यस वर्षको जनवरी महिनामा १६ हजार ९ सय ७५ जना पर्यटक नेपाल भित्रिएका बोर्डले जनाएको छ । 

अध्यागमन विभागले उपलब्ध गराएको तथ्यांकअनुसार यसरी यस वर्ष जनवरीमा सबैभन्दा धेरै नेपाल भित्रिएका पर्यटकमा सार्क राष्ट्रका सबैभन्दा धेरै पाँच हजार जना छन् । यस्तै एसियाका एक हजार पर्यटक नेपालमा आएका छन् । गएको वर्षमा भने जनवरीमा दुई हजार पर्यटक मात्रै नेपाल घुम्न आएका थिए ।

युरोपबाट भने यस वर्षको सुरुमै ह्वात्तै पर्यटक आएका छन् । यस वर्षको जनवरी महिनामा मात्रै युरोपबाट ३ हजार ५ सय २७ जना पर्यटक नेपाल घुम्न आएका छन् । गएको वर्ष भने जनवरीमा ७ सय ११ जना पर्यटक मात्रै नेपाल आएका थिए । यस्तै अमेरिकाबाट १ हजार ६ सय बढी पर्यटक नेपाल आएका छन् । 

सबै गरेर यस वर्ष १६ हजार ८ सय बढी पर्यटक नेपाल भित्रिएका हुन् । सबै पर्यटक त्रिभुवन अन्तराष्ट्रिय विमानस्थलबाट भित्रिएका हुन् । स्थलमार्गबाट नेपाल आउने पर्यटकको संख्या एकिन छैन ।

गएको वर्ष कोरोना भाइरसको महामारीले गर्दा नेपालको पर्यटक क्षेत्र ठप्प जस्तै भएको थियो । यस वर्ष कोरोना भाइरसविरुद्धको खोपले गर्दा केही सहज भएको छ । 

खोपले गर्दा पर्यटन क्षेत्र यस वर्ष फाट्टफुट्ट चलायमान छ । तर कोभिड महामारीले थला परेको पर्यटन क्षेत्र अझै चलायमान हुन समय लाग्ने पर्यटन व्यवसायी बताउँछन् ।