आफैँ सडक अनुगमन गर्छन् कर्णालीका मुख्यमन्त्री

सुर्खेत : कर्णालीका मुख्यमन्त्री जीवन बहादुर शाहीले वीरेन्द्रनगरमा रहेका निर्माणाधीन सडकको अनुगमन गरेका छन् ।  सडकको अनुगमन गर्दै मुख्यमन्त्री शाहीले समयमै काम सम्पन्न गर्न निर्देशन दिएका छन् ।

शाहीले वीरेन्द्रनगरभित्र लामो समयदेखि काम सम्पन्न नभएका सडकको अनुगमन गर्दै समयमै काम सम्पन्न गर्न निर्देशन दिएका हुन् । विकास निर्माणका आयोजनालाई तोकिएको समयमा कार्य सम्पन्न गराउनको लागि शाहीले नियमित रुपमा विकास निर्माणका कामहरुको अनुगमन गर्ने क्रममा शाहीले बुधवार सडकको अनुगमनमा निस्किए । 

शाहीले मंगलगढी चोक–काँक्रेविहार सडक, दैलेख रोड, शंकर चोक–पृतना गेट सडक, जिल्ला अदालत सुर्खेत अगाडी निर्माणाधीन सडक, ईत्रामस्थित मुख्यमन्त्री निवास नजिकैको सडक अनुगमन गरेका छन् ।

त्यसैगरी सुर्खेत विमानस्थल नजिकै निर्माणाधीन सडक, ईटौरा पूल, भैरवस्थानमा निर्माणाधीन विभिन्न सडक, शहिद पार्क जाने सडक र शहिद पार्कको पनि अनुगमन गरेका छन् । प्रदेश सरकारद्वारा विनियोजित बजेट अनुसार समयमै काम सम्पन्न गर्न मुख्यमन्त्री शाहीले पटक–पटक सरोकारवाला निकायलाई निर्देशन दिँदै आएका छन् । उनले यसपटकको अनुगमनमा निर्माण सम्पन्न गर्ने लिखित कार्ययोजना पेश गर्न निर्देशन दिएका छन् । 

लामो समयदेखि निर्माण सम्पन्न नभएका सडक आगामी चैत्र मसान्तभित्र सम्पन्न गर्ने प्रदेश सरकारको लक्ष्य रहेको छ । सोही लक्ष्य अनुसार मुख्यमन्त्री शाहीले म्याद सकिएका निर्माणाधीन सडकको चैत्र मसान्तसम्मका लागि म्याद थप गरेका छन् । थप गरिएको म्यादभित्र निर्माण सम्पन्न नगर्ने कम्पनीलाई कालो सूचीमा राख्नका लागि प्रक्रिया अगाडी बढाईने मुख्यमन्त्री शाहीले बताए ।

कर्णालीमा मुख्यमन्त्री शाहीले तीन महिना बितिसक्दा पनि भौतिक पूर्वाधार मन्त्री नियुक्त गर्न सकेका छैनन् । त्यसबाहेक पर्यटन, सामाजिक विकास मन्त्रालय पनि रिक्त छन् । बेला बेला उनी आफैँ चर्चाका लागि पनि मन्त्री नियुक्त गर्न छाडेर अनुगमनमा निस्कने गरेका छन् ।