अनन्यापछि तेलगुमा डेब्यु गर्ने पालो जान्हवीको

मुम्बई - धर्मा प्रडक्सनले आफूले भित्र्याएका कलाकारलाई बारम्बार मौका दिने गरेको छ , चाहे त्यो हिन्दी फिल्ममा होस् वा दक्षिण भारतीय फिल्ममा । ‘स्टुडेन्ट अफ दि इयर २’बाट डेब्यु गरेकी अनन्या पाण्डेले यही परम्परा अन्तर्गत तेलगु फिल्म ‘लाइगर’मा डेब्यु गरेकी थिइन् । हिरो थिए विजय देवकोरान्डा ।

धर्मा प्रडक्सनले यिनै देवकोरान्डासँग आफूले भित्र्याएकी अर्की हिरोइनको जोडी बाँधिदिने निर्णय गरेको छ । मुख्य गरी तेलगु भाषामा बन्ने यो फिल्मबाट जान्हवी कपुरले दक्षिण भारतमा डेब्यु गर्ने भएकी छिन् । फिल्मको नाम रहेको छ, ‘जन गन मन’ ।

यो फिल्मलाई पनि ‘लाइगर’ निर्देशक पुरी जगन्नाथले नै निर्देशन गर्नेछन् । यो फिल्मको सुटिङ फ्रेब्रुअरीको अन्तिममा अमेरिकाबाट सुरु हुनेछ । अहिले फिल्मको प्रिप्रडक्सन चलिरहेको छ । अगस्ट अगाडि यो फिल्मको काम सक्ने निर्माताको तयारी रहेको छ । किनकी ‘लाइगर’ यही वर्षको अगस्टमा रिलिज हुने क्यालेन्डर छ ।