यस्ता छन् मन्त्रिपरिषद्का पछिल्ला निर्णय

काठमाडौं । सोमबार बसेको मन्त्रिपरिषद् बैठकले विभिन्न ७ वटा निर्णय गरेको छ। 

मंगलबार पत्रकार सम्मेलनमार्फत् सरकारका प्रवक्तासमेत रहेका सूचना तथा सञ्चार प्रविधिमन्त्री ज्ञानेन्द्रबहादुर कार्कीले उक्त जानकारी दिएका हुन्।

उनका अनुसार बैठकले खुला विश्वविद्यालयको उपकुलपतिमा शिलु मानन्धरलाई र नेपाल टेलिभिजनको अध्यक्षमा समिरजंग शाहलाई नियुक्त गर्ने निर्णय गरेको छ।

त्यस्तै उनले अर्थ मन्त्रालयका सहसचिव रामेश्वर दंगाललाई सचिवमा बढुवा गर्ने निर्णय गरिएकाे बताए ।

त्यसैगरी विश्व बैंकको १८ अर्ब रुपैयाँ सहुलियतपूर्ण ऋण सहायता दस्तावेजलाई अन्तिम रुप दिन वार्ता टोली गठन गर्ने निर्णय भएकाे उनले बताए ।

त्यस्तै उनले कच्चा दूधको न्यूनतम मूल्य बढाएर ५६.४ रुपैयाँ निर्धारण गरिएको जानकारी दिए ।

त्यसैगरी ‘सफा हिमाल अभियान २०२२’ मा खटिने नेपाली सेनालाई हिमाल आरोहण गर्दा लाग्ने दस्तुरमा छुट दिने बैठकले निर्णय गरेकाे छ ।

त्यस्तै प्रवक्ता कार्कीले शिक्षक अस्पताल निर्माणका लागि शिक्षा मन्त्रालयलाई सैद्धान्तिक स्वीकृतिसमेत प्रदान गर्ने बैठकले निर्णय गरेकाे बताए ।