कोरोनाको जोखिम बढेसँगै मालपोत कार्यालय लमजुङबाट आलोपालो सेवा

लमजुङ – कोरोना संक्रमणको जोखिम बढेसँगै मालपोत कार्यालय लमजुङले सेवा प्रवाह आलोपालो गर्न थालेको छ । कार्यालयमा कार्यरत केही कर्मचारीमा कोरोना संक्रमण पुष्टि भएकाले आलोपालो प्रणालीमा सेवा प्रदान गरिएको कार्यालयले जनाएको छ । मालपोत कार्यालय लमजुङले सूचना जारी गरी माघ १२ गते बुधबारदेखि लागु हुनेगरि आलोपालो सेवा प्रदान गरेको जानकारी गराएको छ ।

अन्य कार्यालयको तुलनामा मालपोत कार्यालयमा सेवाग्राहीको भिडभाड बढी हुने भएकाले भिड नियन्त्रणका लागि आलोपालो सेवा प्रवाह गरिएको कार्यालयका प्रमुख ईश्वरकमल श्रेष्ठले बताए ।  पछिल्लो समय दिनप्रतिदिन जिल्लामा बढ्दो रुपमा रहेको कोरोना संक्रमणका कारण कार्यालयमा कार्यरत कर्मचारी पनि संक्रमित भएको र सेवा लिन आउने सेवाग्राहीमा कोरोनासँग मिल्दोजुल्दो लक्षण देखा परेकाले अर्को सूचना जारी नभएसम्मका लागी आलोपालो प्रणालीबाट सेवा प्रवाह गरिने उनले बताए।

कार्यालय प्रमुख श्रेष्ठका अनुसार आइतबार दूधपोखरी र मर्स्याङदी गाउँपालिकाका सेवाग्राहीलाई सेवा प्रदान गरिएको छ । सोमबार क्व्होलासोँथार गाउँपालिका र दोर्दी गाउँपालिकालाई सेवा प्रदान गरिनेछ । मंगलबार मध्यनेपाल नगरपालिका, बुधबार सुन्दरबजार नगरपालिका, बिहीबार राइनास नगरपालिका र शुक्रबार बेंसीशहर नगरपालिकाका सेवाग्राहीलाई सेवा प्रदान गरिएको कार्यालय प्रमुख श्रेष्ठले बताए ।