कर्णालीमा पनि सत्ता गठबन्धनका उम्मेदवार विजयी

सुर्खेत - राष्ट्रिय सभा सदस्यमा कर्णाली प्रदेशबाट सत्तारुढ गठबन्धनका उमेद्वार विजयी भएका छन् । बुधवार सम्पन्न राष्ट्रिय सभाका सदस्य निर्वाचनमा संयुक्त गठबन्धनका दुर्गा गुरुङ, नरबहादुर बिष्ट र उदय बोहोरा विजयी भएका हुन् । कर्णालीमा महिला, अपांगता भएका व्यक्ति वा अल्पसंख्यक र अन्यतर्फ गरी तीन वटा कलस्टरका तीन सीटका लागि निर्वाचन भएको थियो । गुरुङले दुई हजार नौ सय ७० तथा बिष्ट र बोहोरा समान ३ हजार ६ मतभार प्राप्त गरेका छन् ।

महिलातर्फ नेपाली काँग्रेसकी गुरुङ, अपांगत्ता वा अन्यतर्फ माओवादी केन्द्रका बिष्ट र अन्यतर्फ एकीकृत समाजवादीका बोहोराले उम्मेदवारी दिएका थिए । प्रदेश निर्वाचन कार्यालयका प्रमुख दुर्गाप्रसाद चालिसेका अनुसार निर्वाचनमा सत्ता गठबन्धनका संयुक्त उमेद्वार तीन र एमालेका तीन जना उमेद्वारले भाग लिएका थिए । एमालेबाट महिला तर्फ गंगा थापा, अपाङ्गगता भएका व्यक्ति वा अल्पसंख्यकतर्फबाट पदमबहादुर माझी र अन्य तर्फ चुडामणि शर्मा उमेद्वार थिए । माझीले १ हजार ३ सय ९८ तथा महत र शर्माले समान १ हजार ४ सय ६ मतभार प्राप्त गरेका छन् ।

अपांगतर्फको १ मत र महिला तर्फको २ मत बदर भएको निर्वाचन अधिकारी चालिसेले जानकारी दिए । उनका अनुसार बदर भएका तीन वटै मत स्थानीय तहका प्रमुख उपप्रमुख तर्फका हुन् । कर्णालीमा एक सय ९१ मतदाता संख्या रहेकोमा १ सय ८९ जनाले मतदान गरेका छन् ।

प्रदेशसभाका ३५ र गाउँपालिका तथा नगरपालिकाका प्रमुख उपप्रमुख १ सय ५६ मतदाता रहेका थिए । त्यसमध्ये राप्रपाकी प्रदेश सभा सदस्य शोशिला शाही र कालिकोटको तिलागुफा नगरपालिकाकी उपप्रमुख दन्ता नेपाली (दर्शना) मतदानमा अनुपस्थित रहेको प्रदेश निर्वाचन कार्यालय सुर्खेतले जनाएको छ । 

आफ्ना उमेद्वार नउठाएको राप्रपाले मतदानमा सहभागी नहुने निर्णय गरेकोले निर्वाचनमा सहभागी नभएको प्रदेश सांसद शाहीले बताइन् । यता उपप्रमुख नेपाली दुई बर्षअघि अमेरीका गएर उतै बसेकी छन् । प्रदेश निर्वाचन कार्यालयमा दुई वटा मतदान केन्द्रबाट विहान ९ बजेदेखि ३ बजेसम्म मतदान भएको थियो ।