खोप नहुँदा फ्रन्टलाइनरले पाएनन् 'बुस्टर डोज'

फाइल तस्बिर

काठमाडौँ- उपत्यकाको अधिकांश खोप केन्द्रमा 'भेरोसेल' खोप सकिएका छन् । बुस्टर डोज लगाउन गएका फ्रन्टलाइनरहरू खोप सकिएकाले नलगाइ फर्किएका छन् ।

सरकारले फ्रन्टलाइनरमा काम गर्नेलाई माघ २ गतेदेखि बुस्टर खोप लगाउने निर्णय गरेको थियो । काठमाडौँको विभिन्न १९ वटा खोप केन्द्रबाट वितरण गर्ने सूचना जारी गरेको छ ।

कोभिडविरुद्धको खोप भेरोसेलबाहेक अन्य कोभिशिल्ड र जोनसन एण्ड जोनसन खोप केन्द्रबाट वितरण भइरहेको छ । बुस्टर डोजका रुपमा भेरोसेल खोप लगाउन गएका एक फ्रन्टलाइनरकाअनुसार केन्द्रमा खोप नभएकाले नलगाइ फर्केका छन् ।

सरकारले बिहान १० बजेदेखि खोप कार्यक्रम सञ्चालन गर्ने भने पनि समय अगावै केन्द्रमा खोप सकिएका छन् । बुस्टरको मात्रा थोरै भएकाले लगाउने मानिस धेरै  आएकाले छिटो सकिएको स्वास्थ्य कार्यालय काठमाडौँले जनाएको छ ।

स्वास्थ्य विभागले कार्यालयलाई प्रत्येक खोप केन्द्रलाई दुई सयदेखि तीन सय खोप उपलब्ध गराएको कार्यलयकी खोप फोकल पर्सन अन्जना खड्काले जानकारी दिइन् । 'विभागलाई अनुरोध गरेर भोलिदेखि प्रत्येक केन्द्रमा खोपको मात्रा बढाइन्छ,' उनले भनिन् ।

स्वास्थ्य विभाग अन्तर्गत खोप भण्डार महाशाखा प्रमुख बडेबाबु थापाकाअनुसार केन्द्रीय भण्डारमा भेरोसेल खोप सकिँदै गएको छ । 'भण्डारण केन्द्रमा करिब तीन लाख मात्रा खोप छ,' उनले भने ।

केन्द्रमा भएको भेरोसेल सबै खोपहरू जिल्ला र प्रदेशमा पठाइसकेको उनले जानकारि दिए । भण्डारणमा कोभिशिल्ड र जोनसन एण्ड जोनसन खोप मौज्दात छन् ।

जिल्लामा खोप गइसकेकाले भण्डारणमा सकिएको थापाको भनाइ छ । भेरोसेलको खोपको लागि सिरिन्ज पनि सकिंदै गएको छ ।

रसुवा नाकाबाट सिरिन्ज बोकेको गाडी नेपाल नभित्रिएकाले समस्या हुन सक्ने उनले जानकारी दिए । 'नाकामा १० लाख सिरिन्ज बोकेको गाडी अड्किएको छ,' उनले भने,' नाकाबाट आज र भोलिमा १० लाख सिरिन्ज भित्रिन सक्छ । केही दिनमा थप १० लाख सिरिन्ज पनि आउछ ।'