विद्युत् नियमन आयोगमा आएका कागजपत्र पनि क्‍वारेन्टिनमा

काठमाडौं : विद्युत् नियमन आयोगले आफ्नो कार्यालयमा आउने कागजपत्रहरुलाई पनि क्‍वारेन्टिनमा राख्‍ने गरेको छ । कागजबाट कोरोना भाइरस सर्ने भयले आयोगले दर्ता हुन आएका चिठी पत्र चार दिनसम्म छुँदैन । 

आयोगमा आउने जुनसुकै कागजपत्र, चिठी, प्रतिवेदनलगायत कागजजन्य पदार्थ सितिमिति दर्ता हुँदैनन् । आयोगमा लगिएका र पुर्‍याइएका चिठीपत्रहरु चार दिनसम्म क्वारेन्टाइनमा राख्‍ने गरिएको छ ।

दैनिक दसवटासम्म चिठी आउने आयोगमा कोभिड-१९ प्रति सजग हुँदै चार दिन छुट्टै बाकसमा राख्‍ने गरिएको हो । यसले गर्दा नागरिकहरूको दैनिक काम कारबाही प्रभावित भइरहेको भुक्तभोगीहरूले बताएका छन् ।

यस सम्बन्धमा आयोगका प्रवक्ता डा. रामप्रसाद धितालले चिठीपत्र दर्ता नहुने गुनासो आएको र आयोगले ती गुनासोलाई आफ्नो जानकारीमा लिएको स्वीकार गरे ।

आयोगले 'मानक सञ्‍चालन प्रक्रिया' (स्ट्याण्डर्ड अपरेटिङ प्रोसिड्यूर) लाई अन्तिम रुप दिन लागेको जानकारी दिंदै डा. धितालले यसैमार्फत काम कारबाही अघि बढ्ने बताए । 'यो प्रक्रिया लागू गरेपछि यी भद्रगोल हट्नेछ,' डा. धितालले भने ।