प्रदेश २ को बैठक जारी, राजधानी तथा नामाकरणमाथि छलफल

काठमाडौं–  प्रदेश २ को प्रदेश सभा बैठक चलिरहेको छ । बैठकमा प्रदेशको राजधानी तथा नामाकरणबारे छलफल चलिरहेको छ।

बैठक बिहान ११ बजेबाट सुरु हुने भनिएता पनि तोकिएको समयभन्दा साढे दुई घण्टा पछि सुरु भएको हो । आजको बैठकको मुख्य एजेण्डा नै राजधानी र प्रदेशको नामाकरण गर्ने छ । अहिले े राजधानी तथा नामाकरण सम्बन्धी अध्ययन विशेष समितिको प्रतिवेदनमाथि छलफल जारी रहेको हो ।

अध्ययन विशेष समितिले प्रदेशको नाम मधेस, जानकी, मिथिला–भोजपुरा र मध्य मधेश तथा राजधानी जनकपुरसहित उत्तर पूर्वमा ढल्केवर–कमला हुँदै दक्षिणमा नेपालको सीमासम्म, वीरगन्ज महानगरपालिका र वीरगन्ज, सिमरा जितपुर, निजगढ हुँदै सिम्रौनगढसम्मको भूगोल समेटिएको प्रतिवेदन पेश गरेको छ ।

राजधानी तोक्ने तथा प्रदेशको नामाकरण गर्ने विषयमा सहमति नभए मतदानबाट गरिने तयारी छ । प्रदेश सभा सचिवालयकाअनुसार मतदानका लागि पहिले राजधानी सम्बन्धी प्रस्ताव प्रस्तुत गरिनेछ ।

प्रदेशको नाम ‘मधेस’ जनता समाजवादी पार्टी, लोकतान्त्रिक समाजवादी पार्टी र माओवादी केन्द्रले गरेको प्रस्ताव हो । जानकी नाममा एमाले र नेकपा (एकीकृत समाजवादी) को सहमत छ भने मिथिला–भोजपुरा कांग्रेसको प्रस्ताव हो ।