आयोगले स्वीकृत गर्‍यो मतदान स्थल तथा मतदान केन्द्र निर्धारण कार्यविधि

काठमाडौँ : निर्वाचन आयोगले सरकारले घोषणा गरेको मध्यावधि निर्वाचनलाई लक्षित गरेर ‘मतदान स्थल तथा मतदान केन्द्र निर्धारण कार्यविधि, २०७७’ स्वीकृत गरेको छ । त्यो कार्यविधि कार्यान्वयनका लागि ‘मतदान स्थल तथा मतदान केन्द्र पुनरावलोकन सम्बन्धी कार्यक्रम, २०७७’ पनि स्वीकृत भएको आयोगका प्रवक्ता सचिव राजकुमार श्रेष्ठले विज्ञप्तिमार्फत जानकारी दिएका छन् । 

सरकारले गत पुस ५ गते प्रतिनिधि सभा विघटन गरेर आगामी बैशाख १७ गते पहिलो चरण र २७ गते दोस्रो चरणमा प्रतिनिधि सभा सदस्य निर्वाचन गर्ने घोषणा गरेको छ । 

प्रवक्ता श्रेष्ठले पुस २३ गते बिहीबारबाट जिल्लास्तरमा मतदान स्थल तथा मतदान केन्द्र निर्धारणसम्बन्धी कार्य प्रारम्भ हुने बताए । त्यसका लागि आयोगले प्रमुख जिल्ला अधिकारीको संयोजकत्वमा जिल्ला मतदान स्थल तथा मतदान केन्द्र सिफारिस समिति बनाएको छ । समितिले उक्त यो काम माघ १७ गतेसम्म सक्नुपर्ने कार्यतालिका पनि स्वीकृत भएको विज्ञप्तिमा उल्लेख छ । 

त्यो कार्यसँगै अन्तिम मतदाता नामावली तयारीको प्रक्रिया पनि सुरु गरिएको आयोगले जनाएको छ ।