उदयपुर सिमेन्टको महाप्रबन्धकमा न्यौपाने नियुक्त

काठमाडौं : उदयपुर सिमेन्टको महाप्रबन्धकमा गोपी न्यौपाने नियुक्त भएका छन् । मन्त्रिपरिषद्को सोमबार बसेको बैठकले उनलाई नियुक्त गरेको हो ।

न्यौपाने अहिले नेपाल व्यवसायिक पहल(एनबीआइ)का सचिव हुन् । यस्तै राष्ट्रिय प्राकृतिक स्रोत तथा वित्त आयोगका सदस्यका लागि समेत आवेदन दिएका उनी १० वर्षसम्म बैंक तथा फाइनान्समा संचालक बनिसकेका छन् ।

महाप्रबन्धकका लागि न्यौपानेसँगै काठमाडौंका ध्रुवबहादूर देवकोटा र कपिलवस्तुका भुपेन्द्रप्रसाद अर्याल सिफारिस गरिएको थियो। सिफारिस गरिएका देवकोटा उदयपुर सिमेन्टकै नायब महाप्रवन्धकबाट रिटायर्ड भएका हुन भने अर्याल विभिन्न गैरसरकारी संस्थामा काम गरेका थिए।

सिफारिस समितिको पुस १ को सिफारिस अनुसार उम्मेदवारहरूको शैक्षिक योग्यता, अनुभव, व्यावसायिक कार्ययोजनाको मूल्यांकन, व्यावसायिक कार्ययोजना प्रस्तुतीकरण र अन्तर्वार्तामा उच्चतम अंक प्राप्त गरेको मन्त्रालयले जानकारी दिएको थियो । सिफारिसअनुसार वर्णानुक्रमका आधारमा न्यौपानेलाई पहिलो नम्‍बरमा राखिएको थियो ।