पैदलयात्रीलाई ठक्कर दिई फरार रहेका ट्रिपर चालक पक्राउ

काठमाडौं- काठमाडौं महानगरपालिका–१० बिजुली बजारमा पैदलयात्रीलाई ठक्कर दिई फरार ट्रिपर चालक पक्राउ परेका छन् । बा.२ ख ५१४५ नम्बरको ट्रिपरका चालक भक्तपुर सल्लाघारी बस्ने सिन्धुपाल्चोक सेलाङ–५ का ३६ वर्षीय दुर्गा श्रेष्ठलाई प्रहरीले पक्राउ गरेको हो ।

पैदलयात्री भक्तपुर व्यासी बस्ने कालिकोट पंचाल झरना गाउँपालिका–२ घर भएका २२ वर्षीय बिपिन बिकलाई ट्रिपरले आइतबार राति ठक्कर दिएको थियो । ठक्करबाट बिपिनको मृत्यु भएको र चालक ट्रिपरसहित फरार भएका थिए । ठक्कर दिई चालक फरार रहेपछि महानगरीय प्रहरी परिसर काठमाडौंबाट खटिएको प्रहरीले पेप्सीकोला खहरेमा लुकाई राखेको टिपर सहित श्रेष्ठलाई सैनिक प्रहरीको सहयोगबाट पक्राउ गरेको हो ।

यस सम्बन्धमा थप अनुसन्धान भइरहेको महानगरीय प्रहरी परिसर काठमाडौंले जनाएको छ।