पाइपलाइनबाट पेट्रोलियम पदार्थ ढुवानीलाई नियमन गर्ने आदेश

काठमाडौं : पाइपलाइनबाट पेट्रोलियम पदार्थ ढुवानीलाई नियमन गर्न सरकारले सुरक्षा तथा नियमन आदेश जारी गरेको छ । अतिसंवेदनशील मानिने प्रज्वलनशील पेट्रोलियम पदार्थ ढुवानी गर्ने पाइपलाइनको सुरक्षाको लागि आदेश जारी गरेको हो ।

राजमार्ग वा अन्य सडकको क्षेत्राधिकारभित्र बिछ्याइएको पाइपलाइनको छेउछाउ निर्माण कार्य गर्न प्रतिबन्ध लगाएको छ । पाइपलाइनको मध्य भागदेखि दायाँ र बायाँ दुवैतर्फ तीन-तीन मिटरको क्षेत्रमा कुनै संरचना बनाउन नपाइने उल्लेख छ । त्यसबाहेकको हकमा पाइपलाइनको मध्य भागदेखि दायाँ र बायाँतर्फ १०-१० मिटर क्षेत्रमा खन्‍ने, संरचना बनाउन नपाइने भनिएको छ ।

तर यो क्षेत्रभित्रको निजी वा अन्य कुनै निकायले संरचना बनाउनुपरेमा सरकारबाट स्वीकृति लिनुपर्ने हुन्छ ।

पाइपलाइनको सुरक्षाको लागि सरकारले नै निर्णय गरी सुरक्षा निकायलाई जिम्मा दिनेछ । पाइपलाइनको सुरक्षाको लागि हातहतियार बाहेकको यन्त्र तथा उपकरणको खर्च आयल निगमले व्यहोर्नेछ ।

सार्वजनिक सुरक्षामा जोखिम पर्ने देखिएमा पेट्रोलियम पदार्थ निर्यात गर्ने मुलुकलाई जानकारी गराई बन्द गर्न सक्ने व्यवस्था छ ।