लोगो दुरुपयोग भएको युएसएडको स्पष्टोक्ति

काठमाडौँ– शनिबार ‘मानवमैत्री चक्रपथ : नागरिक सरोकार कार्यक्रम’ले चक्रपथका विभिन्न ठाउँमा गरेको प्रदर्शन र र्‍यालीमा अमेरिकी सहयोग नियोग (युएसएड)को लोगो दुरुपयोग भएको युएसएडले जनाएको छ ।

ह्वीलचेयर प्रयोगकर्ताहरूले चक्रपथमा यात्रा गर्नु जोखिमपूर्ण रहेको र यसलाई मानव मैत्री बनाउनुपर्ने भन्दै फेज नेपाल र इन्डिपेन्डेन्ट लिभिङ्ग सेन्टर, ललितपुरको आयोजनामा प्रदर्शन गरेका थिए । 

उक्त प्रदर्शनका क्रममा सहभागीले बोकेको ब्यानरमा फेज नेपाल र इन्डिपेन्डेन्ट लिभिङ्ग सेन्टरसहित युएसएडको लोगो पनि राखिएको थियो । चीन सरकारको सहयोगमा बनेको चक्रपथमा अमेरिकी सहयोगमा प्रदर्शन हुने अनि अमेरिकी सरकारको एमसीसी अन्तर्गतको अनुदान सहयोग विरुद्ध चीनको सहयोगमा विरोध भएको भन्दै सार्वजनिक आलोचना भइरहेको छ । 

यसैबीचमा अमेरिकी सहयोग नियोगले आफूले आन्दोलन र प्रदर्शनका लागि कुनै सहयोग नगरेको र आफ्नो लोगो दुरुपयोग भएको स्पष्ट पारेको छ । युएसएडले विकलांगहरूलाई सशक्तीकरण गर्न र सम्मानपूर्वक बाँच्न पाउने अधिकार स्थापित गर्नका लागि फेज नेपालसँग काम गरिरहेको र उसले विकलांग समावेशीताको क्षेत्रमा गरेको कामको सह्राना गर्दै फेज नेपाललाई कुनै प्रदर्शन र र्‍यालीका लागि सहयोग नगरेको स्पष्ट पारेको छ । 

‘युएसएडको लोगो अनुचित ढंगले प्रयोग गरिएकोप्रति हाम्रो ध्यानाकर्षण भएको छ र यो घटनालाई अध्ययन गरिरहेका छौं,’ युएसएड नेपालले भनेको छ । 

ह्वीलचेयर प्रयोगकर्ताले चक्रपथलाई मानव मैत्री बनाउन सकिने प्रशस्त गुञ्जायास रहेको भन्दै त्यसतर्फ अग्रसरता लिन सरकारलाई आग्रह गरेका छन् । 

USAID/Nepal did not in any way initiate the organization of a civil protest in Kathmandu today. We are aware that USAID's logo was inappropriately used in the banners for this event and we are looking into the matter closely.[2/2]

— USAID/Nepal (@USAIDNepal) January 8, 2022