धनुषामा ट्रकमा आगजनी, तीन जना पक्राउ

जनकपुरधाम - सीके राउत नेतृत्वको जनमत पार्टीका कार्यकर्ताहरुले धनुषामा एक ट्रकमा आगजनी गरेका छन् । पुर्व पश्चिम राजमार्ग अन्तर्गत जिल्लाको गणेशमान चारनाथ नगरपालिका १ छघरियामा ना १ क ७७६९ नम्बरको ट्रकमा जनमतका कार्यकर्ताले आगजनी गरेको प्रहरीले जनाएको छ ।

सोमवार दिउँसो करिब साढे ३ बजे पश्चिमबाट पूर्वतर्फ आइरहेको उक्त ट्रकमा किसान आन्दोलनको क्रममा आन्दोलनकारीले आगो लगाएको जिल्ला प्रहरी कार्यालय धनुषाले जनाएको छ ।

आगजनीबाट ट्रक पुर्ण रूपमा क्षतिग्रस्त बनेको छ । आगजनी गरेको आरोपमा प्रहरीले जनमतका जिल्लाध्यक्ष सहित तीन जनालाई पक्राउ गरेको छ । पक्राउ पर्नेमा जनमत पार्टीका धनुषा अध्यक्ष ओमविक्रम कुशवाहा, कार्यकर्ताद्वय चन्दन कुमार साह र नविन पण्डित रहेको धनुषाका प्रहरी प्रवक्ता एवम डिएसपी जीतेन्द्र कुमार बस्नेतले जनाएको छ ।

तीनै जनालाई ट्रकमा आगो लगाएको आरोपमा पक्राउ गरिएको हो र घटनाको थप अनुसन्धान भइरहेको उनले जनाएको छ ।