एलिजाले साइन गरिन् दीपक श्रेष्ठको फिल्म

तस्बिर : एलिजाको फेसबुक

काठमाडौं :  ‘रङ वे’ निर्देशन पछि फिल्म निर्देशनबाट टाढिएका दीपक श्रेष्ठले नयाँ फिल्म निर्देशन गर्ने भएका छन् । नाम सार्वजनिक भइनसकेको फिल्मका लागि निर्देशक श्रेष्ठले एलिजा गौतमलाई साइन गरेका छन् । 

दुई वर्ष अघि ‘अनुराग’ निर्माण गरेर नेपाली फिल्ममा प्रवेश गरेकी एलिजाले त्यो फिल्ममा अभिनय पनि गरेकी थिइन् । तर, बक्स अफिसमा फिल्मले निराशाजनक प्रदर्शन गरेको थियो । त्यसयता म्युजिक भिडियोमा स्थापित हुन संघर्ष गरेकी एलिजाले यता पनि सोचे झैं सफलता हात पार्न सकेकी थिइन् । तर, दोस्रो फिल्मबाट एलिजालाई दर्शकलाई निराश नबनाउने वाचा गरेकी छिन् ।

निर्देशक श्रेष्ठसँगको सम्झौता गरेको फोटोसँगै उनले लेखेकी छिन् ,‘ नयाँ वर्षमा नवीन कामको थालनी । दिग्गज निर्देशक दिपक श्रेष्ठज्यूको निर्देशनमा माघ १ बाट छायाकन हुने चलचित्रमा सम्झौता गरेकी छु । यहाँहरुको माया, हौसला र प्रेरणाले सदैव कलामा दत्तचित्त हुने ऊर्जा मिलिरहेको छ । वाचा गर्छु म यहाँहरुलाई निराश बनाउनेछैन ।’

लामो समयपछि निर्देशनमा फर्कन लागेका दीपक श्रेष्ठले बीचमा हिरोका लागि थुप्रै अभिनेतासँग कुराकानी गरेका थिए । यो क्रममा बिपिन कार्कीसँग भेट गरेको तस्बिर भने श्रेष्ठ स्वयंले पोस्ट गरेका थिए । तर, फिल्ममा बिपिन वा अरु कोही अभिनेता रहने निर्देशकले सार्वजनिक गरेका छैनन् । 
‘हिम्मत’, ‘पापी मान्छे २’, ‘पर्खी बसेँ’,‘दुःख’ आदि गरी २५ वटा बढी फिल्म निर्देशन गरेका श्रेष्ठ पछिल्लो समय भने फिल्म निर्देशनबाट टाढा रहँदै आएका थिए ।