रनवीर सिंहको ‘८३’ फ्लप, रनवीरसँगै दीपिका पनि घाटामा

मुम्बई - रनवीर सिंहको फिल्म ‘८३’ले समीक्षकबाट ५ मा ५ रेटिङसम्म पाएको छ । तर यो फिल्मले दर्शकबाट भने अपेक्षित माया पाउन नसकेको रिपोर्ट आएका छन् । यही कारण फिल्मबाट निर्माताले ठूलो रकम गुमाउने भएका छन् । 

फिल्म नचल्नुमा समूहमा रहेका निर्माताले यसको मेकिङलाई मुख्य कारण मान्न थालेका छन् । उनीहरूले फिल्मको मेकिङ भारतले १९८३ मा विश्वकप जित्दाको डकुमेन्ट्रीको जस्तो भएको पनि आरोप लगाउन थालेका छन् । त्योबाहेक निर्देशक कबीर खानले फिल्मलाई विनाकाम लन्डनमा सुटिङ गराएको र यसले खर्च बढाएको भन्दै उनको पनि आलोचना सुरु भएको छ । 

भारतमा उस्तै देखिने रंगशाला हुँदाहुँदै कबीर खानले बेकारमा लन्डन लगेर सुटिङ गराएको पनि निर्माताको आरोप छ । फिल्मले बक्स अफिसमा राम्रो कमाइ नगर्दा यसको असर रनवीर सिंहलाई परेको छ । यो फिल्मबाट रनवीर सिंहले ठूलै रकम लिन बाँकी छ । त्योबाहेक रनवीर पत्नी दीपिका पादुकोन यो फिल्मकी निर्माता पनि हुन् । 

यो फिल्म फ्लप भएसँगै कबीर खानका फ्लप फिल्म संख्या दुई पुगेको छ । कबीर खान निर्देशित ‘ट्युबलाइट’ पनि बक्स अफिसमा नराम्ररी फ्लप भएको थियो । यो फिल्मबाट पनि निर्माताले ठूलो रकम गुमाएका थिए ।