बायर लेभरकुजनले बुन्‍डेसलिगा जित्‍न सक्‍ने पाँच कारण

काठमाडौं : बायर लेभरकुजनले एक पटक पनि बुन्‍डेसलिगा जित्‍न सकेको छैन । पाँच पटक लिग उपविजेता बनेको लेभरकुजन पछिल्लो पटक २०१०-११ सिजनमा उपाधि नजिक पुगेको थियो । जारी सिजनमा बलियो लय देखाइरहेको लेभरकुजन अंक तालिकामा बार्यन म्युनिख भन्दा दुई अंकले मात्र पछाडि छ । आरबी लाइपजिगसँगै बार्यनलाई पछ्याइरहेको लेभरकुजन यस पटक साच्चै बलियो देखिएको छ । प्रतिभाशाली युवा खेलाडी र आक्रमक फुटबल खेलाउन माहिर प्रशिक्षक पिटर बोसको समिश्रणले लेभरकुजनले लिग उपाधिमाथि कब्जा जमाउने सम्भावना छ । लेभरकुजनको बुन्‍डेसलिगा जित्‍ने सम्भावनालाई निम्‍न बुँदामार्फत केलाइएको छ । 

लियोन बेलीको बलियो लय 
सन् २०१७ मा बायर लेभरकुजन आइपुगेका जमैकाका लियोन बेलीले आफ्नो दोस्रो सिजनमा नौ गोल र ६ असिस्टको योगदान गरे । तर त्यसपछिका दुई सिजन उनको प्रदर्शन खस्कियो । लेभरकुजनको प्रतिभाशाली युवा खेलाडी खरिद गर्ने रणनीति बमोजिम बेल्जियमको गेन्‍कबाट खरिद गरिएका बेलीले यस सिजन भने आफुलाई जर्मन क्लबको प्रमुख हतियारका रुपमा स्थापित गराएका छन् ।

लेभरकुजनका लागि निरन्तर गोल गर्ने र गोलको अवसर सिर्जना गरिरहेका काई हार्बट्‍स र केभिन भोल्यान्‍डले गत गत सेप्टेम्बरमा क्लब छाडे । जसले बेलीलाई प्रशिक्षक पिटर बोस नेतृत्वको टिमको प्रमुख फरर्वाड बन्‍ने चुनौति र अवसर प्राप्त भयो । त्यसमा बेली चुकेका छैनन् । त्यसकै नतिजा हो, उनले १२ खेलमा चार गोल र पाँच असिस्ट । बुन्‍डेसलिगामा मात्र होइन, युरोपा लिगमा पनि बेलीको बलियो लय जारी छ । युरोपियन क्लब फुटबलको दोस्रो श्रेणीको प्रतियोगितामा लेभरकुजनले अन्तिम १६ मा स्थान बनाउँदा बेलीले पाँच गोल गरिसकेका छन् । यदि उनले हालको लयलाई निरन्‍तरता दिए लेभरकुजनले उपाधि उचाल्ने सम्भावना बलियो हुनेछ । 

सुन्दर फुटबल 
सन् २०१७ मा आयाक्सलाई युरोपा लिगको फाइनलमा पुर्‍याएका डच प्रशिक्षक बोस त्यही वर्ष बोरुसिया डर्टमन्‍ड पुगे । जहाँ उनको बसाई धेरै लामो भएन । आक्रमक फुटबल खेलाउने बोसले डर्टमन्‍डमा पर्याप्त समय नपाए पनि लेभरकुजनमा भने उनीमाथि धैर्यता देखाइएको छ । उनै बोस अहिले लेभरकुजनमा सुन्दर फुटबल खेलाइरहेका छन् ।

जारी लिगमा लेभरकुजन शीर्षस्थानको बार्यन म्युनिख भन्‍दा दुई अंकले मात्र पछाडि छ । बार्यनसँग डिसेम्बर १९ मा २-१ ले पराजित हुनुअघि लेभरकुजन आफ्‍ना पछिल्ला तीन खेलमा अपराजित थियो । तीन खेलमा लेभरकुजनले ११ गोल गर्दा मात्र एक गोल खाएको थियो । लेभरकुजनले होफनहाइन, फ्राइबर्ग र बोरुसिया मन्‍चुनग्लाडबाग जस्ता टिमविरुद्ध चार-चार गोल गरेको छ । फरर्वाडहरुले गोल गरिरहँदा लेभरकुजनका रक्षापंक्ति पनि उस्तै बलियो लयमा देखिएको छ । लेभरकुजनले लिगमा बार्यनको भन्दा कम गोल खाएको छ लिगमा सर्वाधिक बलियो रक्षापंक्ति भएको आरबी लाइपजिगको भन्दा तीन गोल मात्र बढी खाएको छ । लेभरकुजनले सुन्‍दर फुटबल पस्किन सक्‍नुमा अग्रपंक्ति देखि रक्षापंक्तिसम्मले आफ्‍नो भूमिका सानदार तरिकाले निभाएको छ । 

फ्‍लोरियन भर्जको उदय 
काई हार्बट्स चेल्सी लागेपछि यसै सिजन सिनियर टिममा बढुवा भएका फ्लोरियन भर्ज युरोपियन क्लब फुटबलमा सबैभन्दा धेरै समय मैदानमा बिताउने किशोर खेलाडी बनेका छन् । जर्मन फुटबलको भविष्य मानिएका भर्जले १२ लिग खेलमा मौका पाएका भर्जले  दुई गोल तथा चार असिस्टको योगदान गरिसकेका छन् । १७ वर्षीय आक्रमक मिडफिल्डरलाई हार्बटस्को प्राकृतिक विकल्पका रुपमा हेरिएको छ ।

चेल्सी जानुअघि लेभरकुजनको जर्सीमा एक सय ५० खेलमा ४६ गोल गर्दै ३१ गोलका लागि पास मिलाएका हार्बट्‍लाई प्रतिस्थापन गर्नु भर्जका लागि चुनौतिपुर्ण छ । तर उनले बलियो सुरुवात गरेका छन् । अर्को जर्मन क्लब एफसी कोलोनका उत्पादन भर्ज, लेभरकुजनका लागि मात्र होईन पुनजागृतको चरणमा रहेको जर्मन राष्ट्रिय टिमका लागि समेत महत्वपूर्ण साबित हुनसक्‍ने खेलाडी हुन् । 

अलारियोको गोल 
अर्जेन्‍टिनाबाट तीन वर्षअघि बुन्‍डेसलिगा आएका लुकास अलारियोले अहिलेसम्म लेभरकुजनको जर्सीमा एक सिजनमा १० लिग गर्न सकेका छैनन् । सुरुवाती दुई सिजन नौ-नौ गोल गरेका अलारियोलाई यस सिजन आफ्‍नो ब्यक्तिगत रेर्कड सुधार्ने मौका छ । उनले यस पटक आठ खेलमा त्यत्ति नै गोल गरिसके ।

क्लबका सर्वोच्च गोलकर्ता रहेका आर्बट्‍स र अर्का भरपर्दा गोलकर्ता भोल्यान्‍डले बुन्‍डेसलिगा छाडेपछि अलारियोको काँधमा लेभरकुजनको अग्रपंत्ति सम्हाल्ने जिम्मेवारी आयो । जसमा उनी चुकेका छैनन् । जारी बुन्‍डेसलिगा सिजनमा प्रति मिनेट गोल अनुपातमा उनी भन्दा बार्यनका रोर्बट लेवेन्‍डोस्की र डर्टमन्‍डका हालान्‍ड मात्र अगाडि छन् । अलारियोले प्रत्येक ७३ मिनेटमा गोल गर्न सफल भएका छन् ।

त्यसो त लेभरकुजनसँग अलारियो बाहेक अर्का पनि, स्ट्राइकर छन् । ती हुन्, प्याट्रिक सिक । जसले चार गोल गरिसकेका छन् । गत सिजन लाइपजिगका लागि १० गोल गरेका चेक गणतन्त्रका सिकले सिजन अघि बढ्‍दै गर्दा लेभरकुजनममा अलारियोको बोझलाई हलुका बनाउने काम गर्ने नै छन् । 

पिटर बोस
उर्जावान युवा खेलाडीले भरिएको लेभरकुजनमा प्रशिक्षक पिटर बोसले चाहे जस्तो खेल खेलाइरहेका छन् । अलारियो र सिक जस्ता स्ट्राइकर भएकाले बोसले बुन्‍डेसलिगा मात्र होइन युरोपा र जर्मनीको घरेलु कपमाथि आँखा लगाउन सक्छन् ।

युरोपामा समूह विजेता बनेको लेभरकुजनले आफ्‍नो अन्तिम खेलमा चाल्र्स अरानगुज, सान्टियागो आरिएस, एजेक्विल पालासियोस र पाउलिन्हो जस्ता खेलाडीलाई बेन्‍चमा राखेको थियो । यसबाट पनि के देखिन्‍छ भने बोससँग लेभरकुजनमा पर्याप्त विकल्प छन् ।

लेभरकुजनका बेन्डर दाजुभाई (लार्स र स्भेन) बाराम्बार घाइते भइरहे पनि उनीहरुको अनुपस्थितीमा टिमको सन्तुलन बिग्रेको छैन । त्यसको कारण भनेको बोसको स्पष्ट रणनीति र कुशलतापूर्वक भएका खेलाडीको प्रयोग हो ।

आयाक्समा हुँदा उपाधिको नजिक पुगेर पनि असफल भएको र डर्टमन्‍डको ६ महिनाको बसाईमा आलोचित भएका बोस, लेभरकुजनमा सफल हुने ध्याउन्‍नमा छन् । लगातार दुई क्लबमा असफल साबित भएका बोस तेस्रो पटक पनि उही ताज पहिरहने मुडमा छैनन् ।