देशको विकास नचाहनेले एमसीसीबारे भ्रम फैलाए -  गृहमन्त्री खाण

जनकपुरधाम- नेपालको विकासका लागि रहेको एमसीसीबारे जनतामा भ्रम फैलाइएको गृहमन्त्री बालकृष्ण खाणले आरोप लगाएका छन् । 

नेपाली काँग्रेस प्रदेश २ को अधिवेशनका लागि जनकपुरधाम आएका गृहमन्त्री खाँणले संचारकर्मीहरुसँग कुरा गर्दै नेपालको विकास नचाहने अरुले एमसीसीबारे भ्रम फैलाएको आरोप लगाएका हुन् ।  

नेपालको विकासमा टेवा पुर्‍याउने लक्ष्य सहितको एमसीसी परियोजनालाई नेपाल सरकारले अघि बढाइसकेको उनले बताए । 'यस अघिका सरकारहरुकै पालामा परियोजनाका लागि सम्झौतासहित प्रक्रियाहरु अगाडि बढाइएको थियो, अब सम्झौतालाई कार्यान्वयन गर्ने हाम्रो दायित्व रहेकोले सोही अनुरुप सरकारले तयारी थालेको छ', उनले भने । 

गृहमन्त्री खाँणले एमसीसी परियोजना ऋणमा नभई निशर्त अनुदान भएको स्पष्ट पारे । सरकारले नेपालको विद्युतिकरण र सडक निर्माणका लागि गरेको प्रस्तावलाई अमेरिकी सरकारले स्वीकार गरी एमसीसी परियोजना आएको उनले बताए ।