भृकुटीमण्डपका व्यापारीहरुलाई व्यवस्थापन गरेर मात्रै मेगा हल बनाउन सुझाव

काठमाडौँ - भृकुटीमण्डपमा काठमाडौं महानगरपालिकाले अत्याधुनिक मेगा हल निर्माण गर्दा व्यापारीहरुलाई व्यवस्थापन गरेर मात्रै निर्माण गर्न माग गरिएको छ । 

सोमबार भृकुटीमण्डप निम्न व्यापारी संघको २७ औं वार्षिक साधरणसभामा सहभागी भृकुटीमण्डप बजारका अधिकांश व्यापारीहरुले यस्तो धारणा राखेका हुन् । 

भृकुटीमण्डपका व्यापारीहरुले फोहोर फाल्ने स्थान सफा गरेर व्यवसाय गर्ने वातावरण बनाएकाले अब यहाँका व्यापारीहरुले व्यापार गर्ने स्थायी संरचना बनाएर मात्रै प्रदर्शनी हल बनाउनु पर्ने माग गरेका छन् । 

विगत लामो समयदेखि भृकुटीमण्डपमा व्यापार गर्दै आएका व्यापारी शंकर पोखरेलले ठूला ठूला प्रदर्शनी हल बन्नु राम्रो विषय भएको बताए । तर, उनले भृकुटीमण्डपमा निम्न वर्गीय व्यापारीहरुले व्यवसाय गरेर परिवार पाल्ने गरेको भन्ने ख्याल गर्नु पर्ने बताए । 

उनले मेगा हल बनाए पनि भृकुटीमण्डपमा व्यापार गर्दै आएका १५ सय व्यापारीको लागि स्थायी ठाउँको व्यवस्थापन गर्नु पर्ने बताए । उनले भने, ‘भृकुटीमण्डपमा अत्यन्तै निम्न वर्गीय मानिसहरुले व्यापार गर्दै आएका छन् । यहाँ व्यापार गर्ने १५ सय व्यापारी हल बन्ने वित्तिकै कहाँ जानु । सरकारले व्यापार गर्ने यस्तै अर्को स्थायी संरचना निर्माण गरिदिनुपर्छ । हामीले गुणस्तरीय सामान ग्राहकहरुलाई बेच्दै आएका छौं ।’

त्यस्तै अर्को व्यवसायी पुष्करकुमार अधिकारीले सरकारले यस्ता खालका गुरुयोजना बनाउने तर काम नगर्ने बताए । उनले यो योजना पनि त्यस्तै हो । तर, सरकारले बनाउनु परे पनि फोहोरको ढङगुर फालेर निम्न वर्गीय ग्राहकको सपिङ स्थल बनाएको बताए । अधिकारीले हल बनाए पनि खासै असर नपर्ने बताए । 

त्यस्तै,व्यवसायी संगीता ढुङगेलले भृकुटीमण्डप महिलामैंत्री बजार भएको बताइन् । उनले यो बजार महिलामैत्री बजार भएकाले बच्चा च्यापेर व्यापार गरिरहेको बताइन् । ढुङगेलले यसरी १५ सय भन्दा बढिले रोजगारी पाएको स्थानमा हल बनाउँदा सरकारले यहाँका व्यापारीलाई उचित व्यवस्थापन गरेर मात्रै काम गर्नु पर्ने बताए । 

काठमाडौं महानगरपालिकाले भृकुटीमण्डपमा रहेको दुई सय १२ रोपनी क्षेत्रफलमा अत्याधुनिक मेगा हल निर्माण गर्ने योजना बताएको छ ।  महानगरपालिकाले एक वर्ष अगाडि नै मुलुकको अर्थव्यवस्थालाई चलायमान बनाउने र पर्यटन प्रवर्द्धन गर्ने उद्देश्यले अत्याधुनिक मेगा हलको योजना अघि बढाएको हो । 

महानगरले निर्माण गर्ने मेगा हलको प्रस्तावित डिजाइन समेत तयार पारिसकेको छ । १ लाख १४ हजार वर्गमिटरभन्दा केही बढीको पाँचतले मेगा हल निर्माणका लागि प्रस्तावित डिजाइन तयार गरिएको छ ।