‘हनी ट्रयाप’मा पार्न खोज्ने महिलासहित दुई जना पक्राउ

फाइल फोटो

जनकपुरधाम - जबरजस्ती करणीको मुद्दामा फसाइ दिने धम्की दिई रकम ठगी गरेको आरोपमा सप्तरी प्रहरीले एक महिलासहित दुई जनालाई पक्राउ गरेको छ ।  पीडितले दिएको जाहेरीको आधारमा ठगी आरोपमा जिल्लाको खडक नगरपालिका–९ लालपट्टीका ३२ वर्षीय मो. रहमान मियाँ र २५ वर्षीया रुबिना खातुनलाई पक्राउ गरिएको जिल्ला प्रहरी कार्यालय सप्तरीका प्रहरी प्रवक्ता प्रहरी नायव उपरीक्षक माधवप्रसाद काफ्लेले बताए ।

काफ्लेका अनुसार रुबिना खातुन र रहमान मियाँ मिलेर पीडितसँग जबरदस्ती करणी मुद्दा मिलाइ दिने नभए फंसाइ दिने भनी एक लाख ठगी गरेको आरोपमा पक्राउ गरिएको हो । रुबिना खातुनले आफ्नो खडक नगरपालिका–९ कै समसुल मियाँको श्रीमती गुलेसा खातुनको मोबाइलमा फोन गरी तिम्रो लोग्नेले मलाई जवरजस्ती करणी गरेको मुद्दा मिलाउने हो भने मलाई ४ लाख रुपैयाँ दिनुपर्छ भन्दै दुई लाखमा बार्गेनिङ गरी मंसिर १० गते पेश्कीस्वरुप एक लाख रुपैया लिएकी थिइन । 

बाँकी रुपैया रुबिनाले ताकेता गर्न थालेपछि आजित भएर पीडित समसुलले प्रहरीमा उजुरी दिएपछि उक्त घटनाको अनुसन्धान गर्दै जाँदा दुवै जनालाई पक्राउ गरिएको प्रवक्ता काफ्लेले बताए । अनुसन्धानको क्रममा रुबिनाले विदेशबाट आएका युवाहरुलाई लोभ्याएर सम्पर्कमा ल्याई यस्तै किसिमले बार्गेनिङ गर्ने र नदिनेलाई जबरदस्ती करणी मुद्दा फसाउने गरेको काफ्ले बताए ।