विदेशी दबाब, प्रभाव र हस्तक्षेप अस्वीकार्य : थापा

हेटौंडा : राप्रपा अध्यक्ष कमल थापाले गणतन्त्र ,धर्मनिरपेक्षता र संघीयता विदेशी एजेण्डा भएको बताएका छन् । विदेशीको इसारामा माओवादीले सुरुमा त्यो भारी बोकेर आएको र केही समयपछि कांग्रेस-एमाले त्यो भारी बोक्न तयार भएको दाबी गरे । 

मकवानपुरको आफ्नो चुनावी क्षेत्र बागमती गाउँपालिकाको छतिवनमा म‌ंगलबार आयोजित अगुवा कार्यकर्ता भेलामा थापाले विदेशीको प्रायोजनमा भएको आन्दोलनले जनताको असली भावना बोक्न नसक्ने बताए । 

राप्रपा सबै धर्मलाई बराबरीको समानता र स्वतन्त्रताको पक्षमा रहेको र पहिचानको रूपमा हिन्दुराष्ट्र हुनुपर्ने भन्दै थापाले कुनै धर्म र आस्थाप्रती आफ्नो आपत्ति नभएको तर योजनाबध्द ढंगले धर्म परिवर्तन गराउदै हिड्ने प्रवृत्तिको भने विरोध गरेको स्पष्ट पारे । धर्म नास हुँदा नैतिक मूल्य, मान्यता र चरित्र समाप्त हुने उनको भनाइ छ । 

 विदेशीहरू आएर नेताको घर घरमा गरेको दौडले स्वाभिमान र सार्वभौमिकता कमजोर भएको थापाको भनाइ थियो ।