कैलालीमा बस र स्कारपियो ठोक्कियो, २७ घाइते

कैलाली- कैलालीमा आज बिहान बस र स्कारपियो जीप एकआपसमा ठोक्किँदा २७ जना घाइते भएका छन् । 

लम्कीचुहा नगरपालिका ३ स्थित गोराङ्गेमा काठमाण्डौँबाट महेन्द्रनगर तर्फ जाँदै गरेको सुपप्र ००२-००१ ख १०८४ नम्बरको बस र पश्चिमबाट पूर्वतर्फ जाँदै गरेको से १ च १५९३ नम्बरको स्कारपियो जीप एक आपसमा ठोक्किएको जिल्ला प्रहरी कार्यालय कैलालीले जनाएको छ । बस सडकको किनारमा पल्टिएको छ भने जीप सडक छेउमा रहेको डिभाइडरमा ठोक्किएको प्रहरीले जानकारी दिएको छ । 

स्कारपियो जीपमा सवार धनगढी स्थित लक्ष्मीनारायण मन्दिरका स्वामी देवराज आचार्य सहित जीपमा सवार चालक र अन्य ३ जना  र बसमा सवार ३८ जना गरी जम्मा ४१ जना मध्ये २७ जना घाइते भएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले जानकारी दिए ।

घाइते स्वामी आचार्यलाई नेपालगन्ज लगिएको छ भने अन्य घाइतेहरूको लम्की स्थित लालरत्न अस्पतालमा उपचार भइरहेको प्रबक्ता जोशीले बताए ।