हात्तीको बथानले घर भत्काउँदा धर्मानन्द परिवारको बिजोग

फाइल फोटो

कञ्चनपुर - लालझाडी गाउँपालिका–४ का धर्मानन्द भट्टको घर आज बिहान आएको हात्तीको बथानले भत्काइदिएको छ । घर भत्काइदिँदा भट्टको परिवार बिचल्लीमा परेको छ । लालझाडी संरक्षण वन क्षेत्र हुँदै बस्ती छिरेको एक दर्जनभन्दा बढीको सङ्ख्यामा रहेको हात्तीको बथानले घर भत्काई घरभित्र राखेको अन्नसमेत सबै खाएर बिजोग बनाएको पीडित भट्टले बताए । 

“हात्तीको बथानले बिहानको झिसमिसेमै घर भत्काउन थालेपछि बालबालिकासहित एकसरो लुगामै भागेर ज्यान जोगाउन सकेका छौँ”, उनले भने, “घर पूरै क्षतिग्रस्त बनाइदिएपछि छिमेकीको शरणमा बस्न बाध्य भएका छौँ ।” अन्न, लत्ताकपडा र खाना बनाउन प्रयोग हुने भाँडाकँुडासमेत हात्तीको बथानले कामै नलाग्ने बनाएको उनको भनाइ छ । वडाध्यक्ष बहादुर रानाले हात्तीले भट्ट परिवारको घर क्षतिग्रस्त बनाउनुका साथै घरभित्र राखेको सबै सामान खुट्टाले कुल्चेर क्षति पु¥याएको बताए । 

उनका अनुसार हात्तीको बथानले झण्डै रु दुई लाखको क्षति गरेको छ । यसैगरी शुक्लाफाँटा राष्ट्रिय निकुञ्ज विस्थापितको तारापुर शिविरमा बसोबास गर्दै आएका बासिन्दा एक सातादेखि हात्ती भगाउन जाग्राम बस्न थालेका छन् । विस्थापित परिवार बस्दै आएको झोपडी हात्तीबाट जोगाउन आगो बाल्ने, होहल्ला गर्ने कार्यसँगै पटाका पड्काएर हात्ती भगाउँदै आएका छन् । हात्ती साँझ नपर्दै बस्तीमा छिर्ने भएकाले रातभर पालैपालो जाग्राम बसेर भगाउँदै आएको नरिभान ढुङ्गालले बताए । 

भारतीय दुधुवा नेशनल पार्कबाट हात्तीको बथानले प्रतिवर्ष शुक्लाफाँटा राष्ट्रिय निकुञ्ज हँुदै मध्यवर्ती क्षेत्रमा बसोबास गर्दै आएका बासिन्दाको घर भत्काउने, घाइते बनाउने र मानवीय क्षति गर्दै आएको छ । 

हात्तीको आक्रमणबाट दुई वर्षको अवधिमै शुक्लाफाँटा नगरपालिका क्षेत्रका तीन जनाले ज्यानसमेत गुमाइसकेका छन् । तराई हुँदै हात्तीको बथान चुरे क्षेत्रसम्म पुग्ने गरेको छ । रासस