रुकुम पूर्वमा ५० श्ययाको अस्पताल निर्माण हुने

रुकुमपूर्व - रुकुमपूर्व अस्पताल निर्माण गरिएको लामो समयपछि त्यसै ठाउँमा ५० श्ययाको अस्पताल निर्माण गरिने भएको छ । सिस्ने गाउँपालिका-५ स्थित पुरानै अस्पताल रहेको ठाउँमा पचास श्ययाको नयाँ संरचना निर्माण गर्न लागिएको हो ।

सो गाउँपालिकाको अध्यक्ष कुमारी बराल, प्रमुख जिल्ला अधिकारी लक्ष्मी बास्कोटा, अस्पताल विकास समिति अध्यक्ष फत्तेकुमारी ओली, अस्पतालका निमित्त मेडिकल सुपरिटेन्डेन्ड डाक्टर गनेश चौधरीले बुधबार संयुक्त रूपमा अस्पताल भवनको शिलान्यास गरेका छन् । 

लुम्बिनी प्रदेश सरकार ग्रामीण तथा शहरी विकास मन्त्रालयबाट प्राप्त बजेट र शहरी विकास तथा भवन कार्यालय दाङको प्राविधिक सहयोगमा भ्याटबाहेक १६ करोड रूपैयाँ लगानीमा सो अस्पतालको भवन निर्माण हुने लागेको बताइएको छ । खड्का-पिएस-जेभी निर्माण कम्पनीले भवन निर्माणको जिम्मा लिएको छ । गत जेठ ३ गतेदेखि काम सुरु भएकोमा ०८० साल साउन २० गते भवन निर्माण गरिसक्ने भनेर सम्झौता भएको निर्माण सेवा कम्पनीका प्रतिनिधि प्रकाश शाहले जानकारी दिए ।