मंसीर २८ को संसद बैठकको कार्यसूची के हो ?

काठमाडौँ– सरकारको सिफारिशमा राष्ट्रपति विद्यादेवी भण्डारीले मंसीर २८ गते अर्थात् आगामी साता मंगलबार संसद बैठक आह्वान गरेकी छिन् । संसद् सचिवालयले २८ गते २ बजे संसद् बैठक बस्ने सूचना पनि जारी गरेको छ । 

तर सरकारले संसदको उक्त बैठकमा के बिजनेस दिने भन्ने संसद्लाई जानकारी गराएको छैन । संसद सचिवालयले उक्त दिनको दैनिक कार्यसूची प्रकाशन गरेको छैन । 

डिसेम्बर १४ अर्थात् सोही दिन अमेरिकामा मिलेनियम च्यालेन्ज कर्पोरेसन (एमसीसी) को सञ्चालक समिति बैठक बस्दैछ । त्यसकारण कतिपयले एमसीसीसँगको सम्झौता संसदमा पेस गर्नेगरी बैठक बोलाइएको भन्ने अनुमान गरेका छन् । 

सरकारले एमसीसी सम्झौताको प्रक्रिया अघि बढाउन संसद बैठक बोलाएको भनी अमेरिकालाई पत्राचार गर्ने तयारी गरेको छ । यसअघिको संसद बैठकमा एमसीसी सम्झौता अनुमोदनको विषय प्रवेश नपाई कात्तिक २५ मा संसद अधिवेशन हठात् अन्त्य भएपछि एमसीसी बोर्डले असन्तुष्टी व्यक्त गर्दै विज्ञप्ति जारी गरेको थियो । 

संसद बैठक आह्वान गरेर विजनेस नपठाएको अवस्थामा संसद आफैं सक्रिय भएर सरकारसँग विजनेस माग्नुपर्ने अवस्था रहेको संसदका एक वरिष्ठ कर्मचारीले बताए ।

अमेरिकाबाट एमसीसी सम्झौताका विषयमा छिट्टो निर्णय लिन पछिल्लो दुई महिनामा एमसीसीकी उपाध्यक्ष फातेमा जेड सुमार र अमेरिकी सहायक विदेशमन्त्री डोनाल्ड लुले राजनीतिक भ्रमण गरी एमसीसीसँगको सम्झौता अनुसार अनुदान सहयोग लिने या नलिनेबारे चाँडै निर्णय गर्न प्रधानमन्त्री शेरबहादुर देउवा र सबै दलका शीर्ष नेताहरूसँग आग्रह गरेका थिए ।