प्राधिकरणको अवधि समाप्त भएपनि पुनर्निर्माणका बाँकी कामलाई मन्त्रालयहरूबाट निरन्तरता

काठमाडौँ– अर्थमन्त्री जनार्दन शर्माले भूकम्पपछिको पुनर्निर्माणका बाँकी कामहरु सरकारले नियमित कार्यक्रममा राखेर सम्पन्न गरिने बताएका छन् । यस अन्तरगत निजी आवासहरूको काम चालु आर्थिक वर्षमा सम्पन्न गर्ने गरी सहरी विकास मन्त्रालयलाई जिम्मेवारी हस्तान्तरण गरिएको उनले जानकारी दिए । 

राजधानीमा आयोजित नेपालको पुननिर्माणसम्बन्धी अन्तर्राष्ट्रिय सम्मलेनलाई बुधवार सम्बोधन गर्दै अर्थमन्त्री शर्माले २०७२ सालको भूकम्पले भत्काएका स्वास्थ्य संस्था, विद्यालय, सरकारी र पुरातात्विक संरचनाहरू सकारका नियमित कार्यक्रमहरूमा राखी प्राथमिकताका साथ सम्पन्न गरिने उनको भनाई छ । साथै विपद व्यवस्थापन सम्बन्धी कार्यहरू विपद व्यवस्थापन प्राधिकरणमार्फत् सम्पन्न गर्ने व्यवस्था मिलाएको छ मन्त्री शर्माले जानकारी दिए । 

राष्ट्रिय पुननिर्माण प्राधिकरणको कार्यकाल सम्पन्न हुन गइरहेको सन्दर्भमा आयोजित नेपालको पुनर्निर्माण सम्बन्धी सम्मेलनमा बोल्दै अर्थमन्त्री शर्माले भूकम्पबाट क्षतिग्रस्त निजी तथा सार्वजनिक संरचना पुनर्निर्माणको अभियानसँगै मुलुकमा भौगर्भिक जोखिम भएका वस्तीहरूको स्थानान्तरणका लागि एकीकृत वस्ती वकिास कार्यक्रम अघि बढाइएको तथा वस्ती सुधार संरक्षण कार्यमा सरकार गम्भीरतापूर्वक अघि बढेको उल्लेख गरे । 

भूकम्पबाट क्षतिग्रस्त विद्यालय स्वास्थ्य संस्था तथा सरकारी एवम् सार्वजनिक ऐतिहासिक र पुरातात्विक सम्पदाहरूको पुननिर्माणले मुलुकको विभिन्न ऐतिहासिक मठमन्दिर, धरहरा, रानीपोखरी, दरबार हाइस्कुल जस्ता गौरवपूर्ण सांस्कृतिक सम्पदाको पुननिर्माण भएको बताए । 

‘सफल पुननिर्माण कार्यले क्षतिग्रस्त संरचनाको निर्माण मात्र नभई त्यस क्रममा कार्य सम्पादनमा नेपालको निर्णय क्षमता र प्रविधि क्षेत्रको ज्ञानसमेत विकास भएको छ,’ मन्त्री शर्माले भने, ‘साथै राजनैतिक दलहरुको संकल्प, सरकारको जिम्मेवारी र पुननिर्माणमा खटेको जनशक्तिको लगनशिलताको कारणले सफलता हात लागेको हो ।’ 

उनले भूकम्पपछिको प्रतिकूल परिस्थितिमा संविधान निर्माणले पूर्णता पाउनुको साथै भूकम्पपछि भौतिक संरचना पुननिर्माणका लागि राष्ट्रिय पुनःनिर्माण प्राधिकरण पनि गठन भएको र यसको कार्यकाल सन्तोषजनक रूपमा सम्पन्न भएको टिप्पणी गरे । 

दोस्रो संविधानसभाको निर्वाचन पछि संविधान निर्माणका लागि संसदमा बहस गरिरहँदा विनाशकारी भूकम्प आएर नौ हजारले ज्यान गुमाएका थिए भने २२ हजार घाइते भएका थिए । भूकम्पबाट १० लाखभन्दा बढी निजी घर, हजारौँ विद्यालय, स्वास्थ्य संस्था तथा सरकारी संरचना र ऐतिहासिक तथा पुरातात्विक संरचनाहरू भत्किएका थिए ।

उक्त महाविनाशकारी भूकम्पपछि पुनःनिर्माणमा अन्तर्राष्ट्रिय सहयोग जुटाउन तत्कालीन सुशील कोइराला नेतृत्वको सरकारले नेपालको पुनःनिर्माणका लागि अन्तर्राष्ट्रिय सम्मेलन आयोजना गरेको थियो । राष्ट्रिय पुनःनिर्माण प्राधिकरणको अवधि यसै वर्ष पुस महिनाबाट समाप्त हुँदैछ ।