पत्रकार महासंघकी उपाध्यक्ष बाला अधिकारी राजनीतितिरै

फोटो : सामाजिक सञ्जाल फेसबुकबाट

काठमाडौँ : नेपाल पत्रकार महासंघकी केन्द्रीय उपाध्यक्ष बाला अधिकारीले राजनीतिमा लाग्ने औपचारिक घोषणा गरेकी छन् । नेपाली कांग्रेसको १४ औँ महाधिवेशनमा केन्द्रीय समितिको उम्मेद्वारी दिने तयारीमा रहेकी अधिकारीले महासंघ छाडेर औपचारिक राजनीति गर्ने बताएकी हुन् । उनी ओखलढुंगाबाट कांग्रेस महाधिवेशन प्रतिनिधि निर्वाचित भइसकेकी छन् ।

उनले पत्रकार महासंघमै रहँदा विधानका कारण राजनीतिमा प्रवेश गर्न नमिल्ने भएपछि केन्द्रीय समितिमा उम्मेद्वारी दर्ता गरेपछि महासंघको उपाध्यक्ष पदबाट राजीनामा दिने बताएकी हुन् । उनले इकागजसँग कुरा गर्दै भनिन्, ‘मैले केन्द्रीय समितिमा उम्मेद्वारी दर्ता गरेपछि महासंघको उपाध्यक्ष पदबाट राजीनामा दिन्छु ।’

नेपाल पत्रकार महासंघको विधान र आचार संहिताको पालना गर्नु प्रमुख दायित्व भएको भन्दै उनले दोहोरो पदमा नरहने पनि बताइन् । साथै उनले सक्रिय पत्रकारिता नगरी महासंघको पदाधिकारीमा मात्रै सीमित रहनुभन्दा औपचारिक राजनीति गर्नु नै उत्तम हुने उल्लेख गरिन् ।

केही समय पहिले नेपाल पत्रकार महासंघले विज्ञप्ति निकालेर दलको अधिवेशन तथा महाधिवेशनमा प्रतिनिधि बनेकालाई कारबाही गर्ने चेतावनी दिएको थियो । साथै उनले सामाजिक सञ्जालमा समेत राजनीतितिर लाग्ने घोषणा गरेकी छन् ।