स्रोत नखुलेको रकमसहित दरबारमार्गबाट व्यवसायी पक्राउ

काठमाडौँ - नेपाल प्रहरीले स्रोत नखुलेको ६९ लाख ५० हजार रकमसहित एक जनालाई पक्राउ गरेको छ । महानगरीय प्रहरी परिसर काठमाडौं र महानगरीय प्रहरीवृत्त दरबारमार्गबाट खटेको प्रहरी टोलीले उक्त रकमसहित हिरोसी खनाललाई शनिबार राति पक्राउ गरेको हो ।

काठमाडौं महानगरपालिका-१ दरबारमार्गस्थित विइङ ह्युमन कपडा पसलमा जाँचका क्रममा उक्त रकमसहित खनाललाई पक्राउ गरिएको परिसरका प्रहरी उपरीक्षक एवम् प्रवक्ता दिनेश मैनालीले जानकारी दिए । खनालका साथबाट प्रहरीले एक हजार दरका १ सय वटा भएको ४९ बन्डल, ५ सय दरको १ सय वटा भएको ४१ बन्डल र नीलो रङको झोला एक थान बरामद गरेको छ । पक्राउ परेका खनाललाई आवश्यक अनुसन्धान तथा कारबाहीका लागि सम्पत्ति शुद्धीकरण विभाग पुल्चोक पठाइएको प्रहरीले जानकारी दिएको छ । -रासस