डोरमणीले तानतुन ३८ सीट पुर्‍याए

काठमाडौंः प्रदेश सभामा विश्वासको मत लिनुपर्ने भएपछि बाग्मती प्रदेशका मुख्यमन्त्री डोरमणी पौडेलले तानतुन ३८ सीट पुर्‍याएका छन् । ११० सीट रहेको बाग्मती प्रदेश सभामा उनलाई बहुमत पुर्‍याउन ५६ सीट चाहिन्छ । नेपाली कांग्रेसले पौडेललाई समर्थन नगरेको खण्डमा उनको सरकार विघटन हुनेछ । अबको तीनसाता भित्र प्रदेश सभा बैठक बोलाउने तयारी छ । 

प्रदेशसभा बोलाइएपछि पहिलो एजेण्डा अविश्वासको प्रस्तावमाथि छलफल हुनेछ । जसमा सरकारका मुख्यमन्त्रीले प्रदेशसभा सदस्यहरूबाट विश्वासको मत लिनुपर्ने हुन्छ । 

नेपाली कांग्रेसले कसलाई सहयोग गर्ने भन्ने सम्बन्धमा संसदीय दलले निर्णय गरिनसकेको प्रतिपक्षी दलका नेता इन्द्र बानियाँले बताए । यद्यपि, अबको प्रदेश सभा सरकार अल्पमतको हुने भएकाले आधा–आधा कार्यकालका लागि सहकार्य हुनसक्ने उनले संकेत गरे । ‘पार्टीको बैठक बसेर कसरी सहयोग र सहकार्य गर्ने भन्ने हामी तय गर्छौं,’ उनले भने । 

उनले आफ्नो समूहका अतिरिक्त नेपाल मजदूर किसान पार्टी र राष्ट्रिय प्रजातन्त्र पार्टीबाट पनि सहयोग जुटाउनेतर्फ अघि बढेका छन् । ३ सीट रहेको विवेकशीलले भने सरकारमा नजाने घोषणा गरिसकेको छ । ‘जनताले हामीलाई प्रतिपक्षमा रहन म्याण्डेट दिएका हुन्,’ विवेकशीलका तर्फबाट संसदीय दलका नेता रमेश पौडेलले भने । 
राष्ट्रिय प्रजातन्त्र पार्टीका केन्द्रीय सदस्य राजाराम बर्तौलाले अहिलेसम्म कुनै पक्षले राप्रपासमक्ष पहल अघि नबढाएको बताए पनि केन्द्रका नेताहरू प्रधानमन्त्री ओलीको निर्वाचन गराउने कदमलाई समर्थन गरिरहेका छन् । 

मुख्यमन्त्री बन्ने तयारीमा रहेकी प्रचण्ड–नेपाल समूहकी नेतृ अष्टलक्ष्मी शाक्यसँग नेकपाभित्रकै ४५ सांसद रहेको बताइन्छ । कुल ८० सीट रहेको नेकपाका बाँकी सांसदका अतिरिक्त डोरणी पौडेलले नेमकिपा र राप्रपाको समर्थन समेत जुटाइसकेका छन् । यद्यपि २२ सीट रहेको नेपाली कांग्रेसले समर्थन नगरी उनको सरकार जोगिने छैन ।

प्रतिनिधिसभा विघटनपछि ओलीको असंवैधानिक कदमको विरोध गर्नुको सट्टा निर्वाचनको तयारीमा लागेको भनेर कांग्रेस नेतृत्वको आलोचना भैरहेको छ । जसका कारण कांग्रेसले दुवै समूहलाई सहयोग गर्न लागेको छ । प्रदेश १ मा ओली समूह र बाग्मती प्रदेशमा प्रचण्ड–नेपाल समूहलाई सघाउने कांग्रेसको तयारी रहेको बुझिएको छ ।