सौराह आसपासका साना व्यवसायी निराश

सौराह - चितवनको सौराह आसपासका खुद्रा तथा साना व्यवसायीहरूले नेकपा एमालेको हालै सम्पन्न महाधिवेशनताका आशाअनुरूपको व्यापार नभएको गुनासो गरेका छन् । महाधिवेशनका लागि पुगेका प्रतिनिधिहरू सौराह र नारायणी किनारमै केन्द्रित भएकोले आशा गरेअनुसारको व्यापार हुन नसकेको व्यवसायीहरू बताए ।

महाधिवेशनमा चितवन पुगेका नेता, कार्यकर्ता र प्रतिनिधिहरू अधिकांशले सौरहामा नै होटल बुकिङ गरेको र दिउँसोको समयमा अन्यत्र घुम्न जान नपाएकोले पनि अपेक्षाअनुसारको व्यापार हुन नसकेको व्यापारीहरूको बुझाइ छ ।

काेभिड संक्रमणको जोखिमले बन्द भएको होटल पर्यटनलाई महाधिवेशनले जीवन दिएको भन्दै चौतर्फी चर्चा भए पनि सौराह आसपासलाई भने सकारात्मक प्रभाव पार्न सकेन । देशभरबाट प्रतिनिधिहरू आउने भएपछि व्यापार फस्टाउँछ भन्ने सोचे पनि त्योअनुसार व्यपार नभएको साना व्यवसायीहरूको गुनासो छ ।

आयोजक पक्षले सौराह र नारायणी किनारलाई मात्रै केन्द्रित नगरी विभिन्न चोकतिर पाहुनाहरूका लागि आकर्षक कुरा राखिदिएको भए साना व्यवसायीहरूको व्यापार फस्टाउने उनीहरूको भनाइ छ । साना व्यवसायीहरू समेट्न मानिस र सवारीसाधनको भिडलाई व्यवस्थित गरी अन्यत्र ठाउँमा सवारीसाधनको पार्किङको व्यवस्था गर्दै पैदल जाने व्यवस्था गर्न सकेको भए आफूहरूले पनि व्यवसाय उकास्ने मौका पाउने आशा गरेको उनीहरूले बताए ।

कार्यक्रम ठूला होटल र रेष्टुरेन्टमा केन्द्रित हुँदा देशभरका मानिसहरूले स्थानीय खानाको स्वाद लिन नपाएको पनि व्यवसायीहरूले बताए । महाधिवेशनमा गएका पाहुनालाई लक्षित गरेर व्यवसाय सञ्चालन गरे पनि अपेक्षाअनुसारको व्यापार नभएको यवसायी बताउँछन् । महाधिवेशनस्थलमा आयोजकहरूले साना व्यवसायीहरूका लागि छुट्टै स्टलको व्यवस्था गरेको भए साना व्यवसायीहरू पनि लाभान्वित हुनसक्ने उनीहरूको दाबी छ । एमालेको १० औँ राष्ट्रिय महाधिवेशन मंसिर १० देखि १४ गतेसम्म चलेको थियो ।

 

र, याे पनि

रक्सी पसलमा कमरेडको लाइन

https://ekagaj.com/article/blog/32448/?fbclid=IwAR1XsUVPBxO-mEapu-qm5QZcuss2AdwOAgOlzhdfVnDMIQ5rJznfZTbitTI