गुल्मीमा ट्रकको ठक्करबाट दुईको मृत्यु

बुटवल : गुल्मीमा ट्रकको ठक्करवाट दुई जनाको ज्यान गएको छ । ज्यान जानेमा रेसुंगा नगरपालिका-१३ का वर्ष २३ का बालकृष्ण भुजेल र वर्ष २४ का टोप बहादुर रजाली रहेका छन् ।

आइतबार विहान २:३० बजेको समयमा बुटवलबाट गुल्मीको सदरमुकाम तम्घास तर्फ आउँदै गरेको ना ५ ख ३२०४ नम्बरको ट्रकले रेसुंगा नगरपालिका १३ अन्तर्गत मसिने खोलामा उनीहरुलाई ठक्कर दिँदा दुवै जनाको घटनास्थलमा ज्यान गएको जिल्ला प्रहरी कार्यालय गुल्मीका प्रहरी उपरिक्षक प्रविणलाल श्रेष्ठले जानकारी दिए ।

ठक्कर दिने ट्रक र चालक गोपाल टण्डनलाई प्रहरीले रातीनै नियन्त्रणमा लिएर जिल्ला प्रहरी कार्यालय गुल्मीमा राखेको छ । घटनाको वारेमा थप अनुसन्धान भइरहेको प्रहरीले जनाएको छ ।