मातृभाषा पत्रकारितालाई सशक्त बनाउन नेवाः पत्रकार दबूको माग

काठमाडौँ – नेवाः पत्रकारहरूको राष्ट्रिय संगठन नेवाः पत्रकार राष्ट्रिय दबूले मातृभाषामा पत्रकारिता विकास गर्न माग गरेको छ । शनिबार ललितपुरको सप्तपुर महाविहार चिकंबहीमा राष्ट्रिय दबूको नवौं वार्षिक साधारण सभामा प्रस्तुत गरिएको १० बुँदे घोषणापत्रमा भनिएको छ, ‘बहुजातीय, बहुभाषिक र बहुधार्मिक संघीय लोकतान्त्रिक गणतन्त्रात्मक संरचनामा प्रवेश गरिसकेको नेपाललाई समावेशी, सहभागितामूलक र लोकतान्त्रिक मूल्यमान्यतामा आधारित जातीय विविधताले युक्त जीवन्त राष्ट्रका रूपमा अगाडि बढाउन सञ्चार माध्यम पूर्णसमावेशी हुनुपर्ने र मातृभाषा पत्रकारितालाई थप सशक्त बनाउनुपर्ने खाँचो छ ।’ 

सप्तपुर महाविहार नेपालको पहिलो मातृभाषाका पत्रकारको धर्मादित्य धर्माचार्य (जगतमान वैद्य) को जन्मथलो हो । घोषणापत्रमा नेपाली सञ्चार माध्यमको अन्तर्वस्तुमा नेपालको विविधता प्रतिविम्बित हुनुपर्ने र त्यसका लागि समाचारकक्षमा नेवाः लगायत आदिवासी जनजाति समुदायको समानुपातिक प्रतिनिधित्व गरिनुुपर्ने एवम् जनजाति सञ्चारकर्मीको क्षमता विकासका लागि आवश्यक कार्यक्रमहरू सञ्चालन गरिनुपर्ने उल्लेख गरिएको छ ।