उदयपुरमा गाँजासहित दुई युवा पक्राउ

उदयपुर - चौदण्डीगढी नगरपालिका- ४ नमूना चोकबाट दुई युवा गाँजासहित पक्राउ परेका छन् । पक्राउ पर्नेमा सप्तरी जिल्लाको सप्तकोशी नगरपालिका- ९ कमलपुर बस्ने वर्ष २६ को रूपेश सदा र वर्ष २९ को जीबछ मण्डल रहेको जिल्ला प्रहरी कार्यलयका प्रहरी नायव उपरीक्षक (डीएसपी) वेदप्रसाद गौतमले बताए ।

बुधबार साँझ बेल्टारबाट सप्तरीको फक्तेपुरतर्फ जाँदै गरेका उनीहरूलाई बेल्टारस्थित इलाका प्रहरी कार्यलयका प्रहरीले पक्राउ गरेको हो । बेलका नगरपालिका क्षेत्रबाट मदन भण्डारी मार्गहुँदै सप्तरीको फत्तेपुरतर्फ स ११ प १७९ नम्बरको मोटरसाइलमा जाँदै गरेका  उनीहरूलाई बुधबार साँझ गस्तीमा रहेको प्रहरीले खानतलासी गर्दा करिव  एक केजी गाँजा फेला पारेको थियो ।

व्यवसायिक रूपमा गाँजा ओसारपसार गर्दै आएका दुवै जनालाई बिहीबार जिल्ला अदालतबाट  म्याद थप गराइ थप अनुसन्धान गरेर  लागुऔषध विरूद्धको मुद्दा चलाउने तयारी भइरहेको प्रहरीले बताएको छ ।