मेटलाइफले सुरु गर्‍यो नयाँ बीमा दावी प्रणाली

काठमाडौँ -मेटलाइफ नेपालले लघुबीमा दाबीका लागि नयाँ दाबी व्यवस्थापन प्रणाली सुरु गरेको छ । यो प्रणालीले ग्राहकलाई छिटो भुक्तानी गर्न म्यानुअल दाबी प्रक्रियालाई प्रतिस्थापन गर्नेछ ।

नयाँ प्रणालीमा दाबी आवश्यकता र डिस्चार्ज भौचरका लागि स्वचालित ईमेल व्यवस्थाका साथै भुक्तानी समय घटाउन स्वचालित दाबी मूल्यांकनजस्ता सुविधा रहेको कम्पनीले बताएको छ । मेटलाइफ नेपालका उपाध्यक्ष तथा महाप्रबन्धक निर्मलकाजी श्रेष्ठले नयाँ दाबी व्यवस्थापन प्रणाली ग्राहक लक्षित रहेकाले यसबाट लाभ लिन सकिने बताए ।
कम्पनीको ग्रामीण कर्जा बीमाले ७७ वटै जिल्लाभरिका लघुवित्त संस्था तथा सहकारीका ऋणीलाई बीमा सुरक्षा प्रदान गर्दै आएको छ ।

मेटलाइफले स्वरोजगार र गरिबी निवारणमा सहयोग गर्ने उद्देश्यका साथ लघुवित्त उद्योगका विज्ञसँग परामर्श गरी नेपालमा लघुबीमा योजना सुरु गरेको थियो ।

कम्पनीले हाल २४ लघुवित्त संस्थासँग साझेदारी गरी ८ लाख ऋणीको बीमा गरेको छ । हालसम्म करिब २४ हजार दाबीबापत १ अर्ब ३० करोड रुपैयाँ भुक्तान गरिसकेको कम्पनीले जनाएको छ ।

कम्पनीका सहायक उपाध्यक्ष तथा प्रमुख वितरण अधिकृत अरुणबहादुर बस्नेतका अनुसार यो प्रणाली सुरु भएपछि दाबी प्रशोधन समय उल्लेख्य रूपमा घटाउन मद्दत गर्नेछ । यसमा दाबी सारांश तयारी, डिस्चार्ज भौचर तयारी र स्वीकृतिका लागि हातबाटै तथ्यांक भर्न र प्रशोधन गर्न नपर्ने कम्पनीको भनाइ छ । यसले लघु ग्राहकलाई समयमै सेवा प्रदान गर्न र प्रणाली सुधार गर्दै डिजिटल सेवामा लैजान सहयोग पुग्नेछ ।