पुरानो पुस्ताको अन्तिम जिल्ला सभापति बन्न सक्छु : विष्णु राई

खोटाङ - नेपाली कांग्रेस खोटाङका नवनिर्वाचित सभापति विष्णु राईले आफूलाई ‘पुरानो पुस्ताको अन्तिम सभापति’ हुनसक्ने बताएका छन् । कांग्रेसको नवनिर्वाचित पदाधिकारीलाई बधाई तथा शुभकामना दिन नेपाल प्रेस युनियनले सोमबार कांग्रेस पार्टी कार्यालयमा आयोजना गरेको कार्यक्रममा जिल्ला सभापति राईले यस्तो बताएका हुन् ।

उनले पछिल्लो समय पार्टीमा पुवा पुस्ताको उपस्थिति बाक्लो हुँदै गएको अवस्थामा आफू जिल्लामा पुरानो पुस्ताको अन्तिम सभापति हुनसक्नेसमेत बताएका छन् । ‘भर्खरै सकिएको अधिवेशनमा पुरानो पुस्ताबाट नयाँ पुस्तामा नेतृत्व लैजान युवाले पहल कदमी गर्नुभयो । तर ५० कै दशकका नेतृत्वबीचबाट नेता छानिएको छ । म नै पुरानो पुस्ताको अन्तिम सभापति हुन सक्छु,’ सभापति राईले भने । 

नवनिर्वाचित सभापति राईले जनप्रतिनिधि गाउँ–गाउँमा पुगे पनि विकास निर्माणको काम हुन नसकेको टिप्पणी गरे । प्रतिनिधिसभा सदस्य विशाल भट्टराई गाउँ–गाउँमा हिँडिरहेको भए पनि विकास निर्माणको सवालमा अपेक्षित प्रगति हुन नसकेको सभापति राईले संकेत गरे ।