करिनालाई मन पर्ने तीन फिल्म

मुम्बइ‌ : करिना कपुर २० वर्षदेखि उद्योगमा सक्रिय छिन् । यो समयमा उनले थुप्रै सुपरहिट सिनेमामा काम गरेकी छिन् । नामै लिन थाल्यो भने लिस्ट लामै हुन्छ । तर, उनले जम्मा तीन फिल्म छान्नु पर्यो भने कुन कुन फिल्म छान्लिन् ? धेरै कलाकार यस्ता प्रश्नमा बासी उत्तर दिएर पन्छिन् खोज्छन् । जस्तो कि ‘ मैले खेलेको फिल्म मेरा लागि उत्तिकै प्रिय छन् । तर, करिना मुख चपाएर बोल्ने अभिनेत्रीमा पर्दिनन् । उनले बलिउड हंगामासँगको कुराकानीमा आफूलाई मनपर्ने तीन फिल्मको नाम निर्धक्क लिएकी छिन् । 

उनले आफ्नो करियरका उत्कृष्ट फिल्मको नाम लिँदा ‘युवा’, ‘ओमकारा’ र ‘जब वी मेट’को नाम लिएकी छिन् । करिनाका अनुसार मनपर्ने फिल्मको लिस्टमा ‘युवा’ एक हो । उनले कारण दिँदै भनेकी छिन्, ‘ मणिरत्नम्सँग काम गर्दा मज्जा आएको थियो । यही फिल्ममा समावेश ‘ए खुदा’ गीत मेरो सबैभन्दा मनपर्ने गीत हो ।’
‘मलाई ‘ओमकारा’ मनपर्छ किनकि यसमा राम्रा कलाकार छन् ।

यो ‘ओथेलो’को रिमेक हो,’उनले आफूलाई मन पर्नुको कारण बताउँदै भनेकी छिन्, ‘डेस्डेमोना मात्र यस्तो महिला चरित्र होला जसलाई उनले ठाउँ दिएर लेखेका छन् ।’उनले थपेकी छिन्, ‘र, अन्त्यमा दुनियाँको फेवरेट र मेरो पनि फेवरेट ‘जब वी मेट’ । दोस्रो बच्चा जन्माउने तयारीमा रहेकी करिनाका ‘जुग जुग जियो’ र ‘लाल सिंह चढ्ढा’ प्रदर्शन हुन बाँकी रहेका फिल्म हुन् ।