कार्कीको निर्वाचन क्षेत्र सुनसरी-४ मा देउवा समूहको 'क्लीनस्वीप'

काठमाडौँ– नेपाली कांग्रेसको प्रतिनिधिसभा निर्वाचन क्षेत्र अधिवेशनका क्रममा सुनसरी क्षेत्र नं. ४ मा सबै महाधिवेशन प्रतिनिधिहरु सभापति शेरबहादुर देउवा समूहबाट निर्वाचित भएका छन् । 

सुनसरी क्षेत्र नं. ४ मा आज सम्पन्न प्रतिनिधिसभा क्षेत्र अधिवेशनमा देउवा समूहले क्लीन स्वीप गरेको हो । त्यहाँबाट २६ जना महाधिवेशन प्रतिनिधि छानिएकोमा २६ जना नै देउवा समूहका हुन् । सञ्चार तथा सूचना प्रविधि मन्त्री ज्ञानेन्द्रबहादुर कार्की निर्वाचित भएको सुनसरी–४ को भर्खरै सार्वजनिक मत परिणाम अनुसार देउवा समूहले उत्साहजनक नतिजा पाएको छ ।  

उक्त क्षेत्रमा पहिले सहमतिका आधारमा प्रतिनिधि छनौट गर्ने विषयमा छलफल भएपनि सहमति नजुटेपछि निर्वाचनमार्फत् सौहार्दपूर्ण प्रतिस्पर्धा भएको थियो । प्रतिनिधिसभा निर्वाचन क्षेत्रको अधिवेशनबाट केन्द्रीय कार्यसमिति छान्ने महाधिवेशन प्रतिनिधि चुनिन्छन् ।

अहिले एक जिल्ला एक निर्वाचन क्षेत्र रहेका जिल्लाहरू र प्रतिनिधिसभा निर्वाचन क्षेत्रमा अधिवेशन भैरहेको छ ।