मोतिपुर औद्योगिक क्षेत्रको विवाद समाधान गर्छु : गृहमन्त्री खाण

बुटवल – गृहमन्त्री बालकृष्ण खाणले रूपन्देहीको मोतिपुर औद्योगिक क्षेत्रको जग्गा विवाद समाधान गर्ने प्रतिबद्धता जनाएका छन् । आइतबार बुटवल लायन्स आँखा अस्पतालको रजत महोत्सवलाई सम्बोधन गर्दै मन्त्री खाणले यस्तो बताएका हुन् ।

यस क्षेत्रमा देखिएको जग्गा विवाद तत्काल समाधान गरेर औद्योगिक क्षेत्र निर्माणको काम तत्काल अघि बढाउने उनले बताए । ‘यहाँ सबैले बुटवललाई राजधानी बनाउँछौं भनेर नै भोट मागेको हो, हामीले स्थापना पनि गर्यौं तर उहाँहरूले अन्यत्रै लैजानु भयो,’ मन्त्री खाणले भने । 

पहिलेदेखि बसोबास गर्दै आएका स्थानीयको पक्षमा आफू रहेको बताउँदै उनीहरूका माग सम्बोधन गरेरमात्रै औद्योगिक क्षेत्र निर्माणको काम अघि बढाउने मन्त्री खाणले बताए ।

‘जनतालाई विस्तापित नगर्ने गरी त्यहाँ औद्योगिक क्षेत्र बन्नेछ, त्यहाँ बसोबास गरिरहेका जनतालाई नहटाइकन औद्योगिक क्षेत्र स्थापनाको व्यवस्था मिलाउनूहोस्,’ रूपन्देहीका प्रमुख जिल्ला अधिकारीलाई उनले निर्देशन दिए । लायन्स आँखा अस्पतालले आँखाकाे स्वास्थ्यमा महत्त्वपूर्ण योगदान गरेको भन्दै अस्पताललाई आवश्यक जग्गाको प्रबन्ध गरिदिने मन्त्री खाणले बताए ।