को बन्‍ला नेकपा दाहाल-नेपाल समूहको महासचिव ?

काठमाडौं : नेकपाका दुवै समूहको केन्द्रीय समिति बैठक आज बस्दैछ । पुष्पकमल दाहाल-माधव नेपाल समूहको बैठक कार्की ब्यांक्वेट बबरमहलमा र प्रधानमन्त्री केपी शर्मा ओली समूहको बैठक बालुवाटार बस्दैछ ।

दाहाल समूहको बैठकले महासचिव टुंगो लगाउने बताइएको छ । आको बैठक विष्णु पौडेललाई हटाएर नयाँ महासचिव टुंगो लगाउने भन्दै शीर्ष नेताहरु छलफलमा जुटेका छन् । महासचिवका लागि जनार्दन शर्मा, भीम रावल, सुरेन्द्र पाण्डे, हरिबोल गजुरेल, वर्षमान पुन, घनश्याम भुसाललगायत नेताहरुको नाम चर्चामा छ । दाहाल र नेपाल अध्यक्ष भएकाले तेस्रो वरियतामा रहेका झलनाथ खनाल समूहका सुरेन्द्र पाण्डेलाई महासचिव बनाउने तयारी रहेको एक नेताले जानकारी दिए ।

ओली समूहले पार्टी प्रवक्ता नाराणकाजी श्रेष्ठ (प्रकाश)लाई हटाएर सोको जिम्मेवारी परराष्ट्रमन्त्रीसमेत रहेका प्रदीप ज्ञवालीलाई दिइएको थियो भने ११९९ सदस्यीय महाधिवेशन आयोजक समिति गठन गर्ने र पार्टी महाधिवेशन २०७८ साल मंसिर २ गते काठमाडौंमा गर्ने निर्णय गरेको थियो । त्यसलगत्तै दाहाल-माधव समूहले भने अध्यक्ष पदबाट ओलीलाई हटाएर माधव नेपाललाई दोस्रो अध्यक्ष बनाउने निर्णय गरेको थियो ।