'अदालतको सेटिङमा देउवा प्रधानमन्त्री बने'

बुटवल- नेकपा एमाले नेता खगराज अधिकारीले प्रधानमन्त्री शेरबहादुर देउवा अदालतको सेटिङमा प्रधानमन्त्री बनेको जिकिर गरेका छन् । शनिबार नेपाल स्वास्थ्यकर्मी संघ रुपन्देहीको तेस्रो जिल्ला अधिवेशनको उद्घाटन गर्दै अधिकारीले यस्तो बताएका हुन् । 

तत्कालीन प्रधानमन्त्री केपी ओलीले गरेको संसद् विघटनको फैसला उल्टाउने र शेरबहादुर देउवालाई परमादेशमा प्रधानमन्त्री बनाउन सर्वोच्च अदालतका सबै न्यायाधीशले राजीनामा दिनुपर्ने अधिकारीको भनाइ छ । प्रधानन्यायाधीशलाई हटाउन बारले आन्दोलन गरिरहेका बेला नेता अधिकारीले प्रधानन्यायाधीश हटेरमात्र समस्या समाधान नहुने तर्क गरेका छन् । 

‘अहिले सर्वोच्चको विवादले संसद् विघटनको फैसला उल्टाउने र परमादेशमा सरकार गठन गर्ने काम सेटिङमा भएको पुष्टि भएको छ,’ उनले भने, ‘सेटिङमा संलग्न सबैले राजीनामा दिनुपर्छ ।’ राष्ट्रपतिको अधिकारको अपव्याख्या गरेर सर्वोच्चले फैसला गरेको र परमादेशबाट बनेको सरकारले फैसला गर्ने न्यायाधीश कसैलाई मन्त्री र कसैलाई तक्माको पुरस्कार दिएको बताउँदै उनले तक्मा लिनु भनेको घूस लिएसरह भएकाले ती सबैले राजीनामा दिनुपर्ने बताए ।

पूर्वगृहमन्त्रीसमेत रहेका अधिकारीले अहिलेको सरकारले स्वास्थ्य क्षेत्रलाई विकृत तुल्याउने काम गरेको आरोप लगाए । ‘अहिले स्वास्थ्य मन्त्रालय घुस्याहाको अखडा बनेको छ । राम्रो काम गर्ने स्वास्थ्यकर्मीलाई अवधि नपुगिकनै सरुवा गर्ने र स्वास्थ्य संस्थालाई कमजोर पार्ने काम भएको छ,’ उनले भने ।

अधिकारीले नेकपा माओवादी केन्द्रमा अध्यक्ष पुष्पकमल दाहाल र एकीकृत समाजवादीका अध्यक्ष माधव नेपाल दलाल पुँजीवादका नेपाली एजेन्ट भएको आरोप लगाए । पैसाका लागि पार्टी फुटाउने अपराधपूर्ण कामको चिन्तनमा दाहाल र माधव नेपालहरू लागेको र यसको फाइदा दक्षिणपन्थीले लिएको भन्दै अधिकारीले एमाले चुनावबाट एमाले फेरि सत्तामा फर्कने दाबी गरे । मदन भण्डारीले सुरु गरेको राष्ट्रिय स्वाधीनताको लडाइँलाई केपी ओलीले अगाडि बढाएको र त्यसैको फलस्वरूप कम्युनिस्ट पार्टी सत्तामा पुग्न सफल भएको उनको भनाइ छ ।