एमाले लुम्बिनी प्रदेशले महाधिवेशनमा ७५ हजार कार्यकर्ता उतार्ने

बुटवल - नेकपा एमाले लुम्बिनी प्रदेश कमिटीले पार्टीको आसन्न १० औं राष्ट्रिय महाधिवेशनमा ७५ हजार कार्यकर्ता सहभागी गराउने भएको छ । यसका लागि एमाले प्रदेश कमिटीले जिल्लागत रूपमा जिम्मेवारी बाँडफाँडसमेत गरेको छ ।

लुम्बिनी प्रदेशबाट सबैभन्दा धेरै रुपन्देही जिल्लाले २२ हजार कार्यकर्ता सहभागी गराउने भएको छ । नवलपरासी र कपिलवस्तु जिल्ला कमिटीलाई १५, १५ हजारका दरले जनसहभागिता गराउने गरी जिम्मेवारी तोकिएको छ । दाङबाट आठ हजार, बाँकेबाट पाँच हजार, बर्दिया र पाल्पाबाट तीन, तीनहजार, गुल्मी, अर्घाखाँची र प्यूठानबाट एक, एक हजार तथा रुकुम (पूर्व) र रोल्पाबाट ५ सयका दरले सहभागिता गराइने एमाले लुम्बिनी प्रदेश कमिटी अध्यक्ष लीला गिरीले जानकारी दिए ।

एमाले लुम्बिनी प्रदेश कमिटीले प्रदेशस्तरमा महाधिवेशनको तयारीलाई तीव्रता दिएको छ । यसका लागि राजमार्गमा डिजिटल विज्ञापन बोर्ड, वडास्तर र पालिकास्तरमा स्वागत गेट निर्माण गरिनेछ । प्रचारका लागि भित्ते लेखन र कुनै पोष्टर भने नटाँसिने गिरीले बताए । महाधिवेशनका लागि लुम्बिनी प्रदेशबाट २ सय ८ जना प्रतिनिधि सहभागी हुँदै छन् ।