चैतमा रिस्ता बस्नेतको ‘पासो’

काठमाडौँ-  रिस्ता बस्नेतको मुख्य भूमिका रहेको ‘पासो’को फस्टलुक सार्वजनिक भएको छ । फस्टलुकसँगै फिल्मको प्रदर्शन मिति पनि सार्वजनिक भएको छ । निर्माण टिमले जारी गरेको पोस्टरमा फिल्म चैत १८ मा प्रदर्शनमा आउने जनाइएको छ । 

रिस्ता केही समयदेखि ठूलो पर्दाबाट हराएकी थिइन् । उनले अभिनय गरेका पछिल्ला केही चलचित्र व्यवसायिक रुपमा सफल हुन नसकेपछि रिस्ताले आफूलाई नयाँ स्वरुपमा ढाल्नका लागि समय लिएकी थिइन् ।

सरु र प्रमिला नाम गरेका दुई जना साथी एक अपराधिक गिरोहद्धारा कुनै उच्च पदस्थ व्यक्तिको शारीरिक तृष्णा मेटाउनका लागि अपहरणमा परेको कथामा यो चलचित्र निर्माण भएको छ । यी दुईले आफूलाई खतरनाक परिस्थितिबाट सुरक्षित राख्न गरेको संघर्षको कथामा यो चलचित्र निर्माण भएको निर्देशक आर.बी पुनले जानकारी दिए ।

चलचित्रमा पुनको नै कथा, पटकथा तथा संवाद छ । चलचित्रलाई भगवान भुजेलले निर्माण गरेका हुन् । चलचित्रलाई क्राइम र सर्भाइभल जनरामा निर्माण गरिएको निर्माण पक्षले जानकारी दिएको छ ।

बसन्त घिमिरे, अनु मुस्कान, अनुराग ढुंगाना, सरस्वती गुरुङ चलचित्रका सह–निर्माता हुन् । चलचित्रमा रिस्ताको साथमा सुनिसा बजगाँई, रामकुमार बस्ताकोटी, प्रतीक दुलाल, प्रणव आकाशको मुख्य भूमिका छ । चलचित्रमा सूर्य दयालुको संगीत, उत्तम हुमागाँइको छायांकन, भूपेन्द्र अधिकारीको सम्पादन छ ।चलचित्रलाई जीजीए गु्रप र एफडी कम्पनीले वितरण गर्दैछन् ।