देउवा क्याम्पमा विमलेन्द्रको प्रतिस्थापन पूर्णबहादुर खड्का

काठमाडौँ– नेपाली कांग्रेसका सभापति शेरबहादुर देउवाका लामो समयदेखिका सहयोगी विमलेन्द्र निधि आसन्न १४औं महाधिवेशनमा देउवासँग प्रतिस्पर्धा गर्ने भएका छन् । नेपाली कांग्रेस विभाजन गरेर देउवाले प्रजातान्त्रिक कांग्रेस निर्माण गर्दामात्र होइन, त्यसयता पनि निधि देउवाका निकट सहयोगी थिए । 

१२औं महाधिवेशनमा देउवाले सुशील कोइरालासँग सभापतिमा प्रतिस्पर्धा गरेर पराजित भएका थिए भने २०७२ फागुनमा भएको महाधिवेशनमा उनी रामचन्द्र पौडेललाई पराजित गरेर सभापति बनेका थिए । एकीकृत पार्टीको सभापति बन्ने चाहना राख्दै देउवाले एक कार्यकाल नेतृत्व गरेपछि १४औं महाधिवेशनमा निधिलाई सघाउने प्रतिवद्धता गरेको निधिको दाबी छ । 

महाधिवेशन नजिकिदैं गर्दा देउवाले पार्टी विधानले दुई कार्यकाल सभापति हुन अनुमति दिएको भन्दै १५औं महाधिवेशनमा निधिलाई सहयोग गर्ने भन्दै फकाउन खोजेका थिए । तर यसपटक निधि रोकिएनन्, उनले १४औं महाधिवेशनमा देउवासँग प्रतिस्र्धा गर्दैछन् । संस्थापन पक्षबाटै अहिलेसम्म सभापतिमा देउवा र निधि दुई जना उम्मेद्वार बनेका छन् भने संस्थापन इतरले एकमात्र उम्मेदवार उठाउने भने पनि सहमति भएको छैन । 

कुनै समय दिवा भोज बैठकमा एक साथ कहिले महाराजगञ्ज, कहिले चाक्सीबासीमा फोटो खिचाउने बीपी कोइराला, गणेशमान सिंह र महेन्द्रनारायण निधिका पुत्रहरूबीच अहिले ठूलो फाटो देखिएको छ । निधिले सबैभन्दा पहिले कार्यालय खोलेर आगामी महाधिवेशनमा सभापति उठ्ने घोषणा गरेका थिए भने एउटै गुटमा रहेका भनिएका प्रकाशमान सिंह, रामचन्द्र पौडेल र शशांक तथा शेखर कोइरालाबीच अनमन शुरु भएको छ । 

शशांकले अचानक प्रकाशमान सिंहमाथि निशाना साँध्न थालेका छन् । शशांकले प्रकाशमान काठमाडौँको मात्र नेता भएको र उपत्यकाबाहिर कसैले नचिन्ने बताएका छन् । त्यस्तै नेता पौडेल र प्रकाशमानबीच बोलचाल नै बन्द भएको छ । प्रकाशमानले देउवा र पौडेलले अब पार्टीको नेतृत्व गर्न नसक्ने भन्दै नयाँ पुस्ताले नेतृत्व लिनुपर्ने बताएका छन् । देउवाले नेतृत्व गरेपछि पार्टी थप कमजोर भएको भन्दै उनले नेतृत्व छोड्नपर्ने भन्दै दबाब सिर्जना गरेका छन् । 

देउवा र निधि १४औं महाधिवेशनमा सौहार्दपूर्ण प्रतिस्पर्धा गर्न तयार भएका छन् । ‘निधिजी जति समय देउवा क्याम्पमा रहनुभयो, सधैं सहयोगी र इमानदार रहनुभयो,’ देउवा निकट एक नेताले भने, ‘निधीजीले क्याम्प छाडेपछि अहिले उहाँको सीटमा पूर्णबहादुरजी (खड्का) बस्नुभएको छ ।’ 

खड्काले गठबन्धन निर्माण गरी सरकार सञ्चालनमा गठबन्धन दलबीच समन्वय गर्दै आएका छन् । आगामी महाधिवेशनमा उनी देउवा क्याम्पबाट उपसभापतिको उम्मेदवार बन्ने बताइएको छ । वर्तमान उपसभापति निधिलाई प्रतिस्थापन गर्दै उक्त ठाउँ देउवा क्याम्पमा आगामी महाधिवेशनका उपसभापतिका उम्मेदवार पूर्णबहादुर खड्काले लिएका छन् ।