राष्ट्र बैंकले उपभोगमा गएको कर्जाको हिस्सा छुट्यायो, उपभोगमा ६ खर्ब २७ अर्ब

काठमाडौँ– नेपाल राष्ट्र बैंकले उपभोग्य क्षेत्रमा परिचालन भएको कर्जाको हिस्सा छुट्याएको छ । चालु आर्थिक वर्षको पहिलो त्रैमाससम्म उपभोग्य क्षेत्रमा ६ खर्ब २७ अर्ब रुपैयाँ कर्जा परिचालन भएको केन्द्रीय बैंकले उल्लेख गरेको छ । 

थोक तथा खुद्रा व्यापार, उत्पादनमूलक क्षेत्रमा र उपभोग्य क्षेत्रमा सबैभन्दा बढी कर्जा परिचालन भएको छ । उपभोगमा परिचालन भएको कर्जा कृषि, निर्माण, यातायात लगायतका क्षेत्रभन्दा धेरै छ । 

नेपाल राष्ट्र बैंकले यसअघि उपभोग्य कर्जाको ठूलो हिस्सा वर्गीकरण नखुलाइ अन्य क्षेत्रमा राख्दै आएको थियो । उपभोग्य क्षेत्रको कर्जा लगानीको हिस्सा छुट्याउँदा पनि अन्य क्षेत्रमा अहिले पनि ५ खर्ब ६ अर्ब भन्दा धेरै कर्जा लगानी भएको छ । 

थोक तथा खुद्रा व्यापारमा बैंकहरूको सबैभन्दा ठूलो लगानी छ । केन्द्रीय बैंकका अनुसार असोजसम्म थोक तथा खुद्रा व्यापारमा झण्डै ९ खर्ब रुपैयाँ कर्जा परिचालन भैसकेको छ । बैंक तथा वित्तीय संस्थाको सबैभन्दा ठूलो कर्जा आयात फाइनान्सिङमा जाने गरेको छ ।

कर्जा लगानीमार्फत् आयात र उपभोग बढाएर बैंकहरूले आम्दानी बढाइरहेका छन् । आयात बढाउनका लागि विदेशी मुद्रा आर्जनको प्रमुख स्रोत रेमिट्यान्स आप्रवाहमा पनि क्रमशः गिरावट आइरहेको छ ।