टर्यो आलिया भर्सेज आलिया भिडन्त

मुम्बई -महामारीका कारण पहिलोपल्ट प्रदर्शन रोकिएको फिल्म ‘गंगुबाई कठैयाबाडी’ले दोस्रो चोटि आउँदो वर्षको जनवरी ६ लाई प्रदर्शन मिति तोकेको थियो । तर यसको केही समयपछि नै ‘बाहुबली’ निर्देशक एसएस राजामौलीले ‘आरआरआर’ यो फिल्म जनवरी ७ मा प्रदर्शन गर्ने घोषणा गरे । 

एक दिनको अन्तरालमा दुई ठूला फिल्म भिड्नेवाला थिए । तर यो भिडन्त फिल्मको मात्र थिएन स्टारको पनि थिएन । स्टार पनि एकै । अर्थात् यो फिल्ममा दुई कलाकार यस्ता थिए जो दुवै फिल्ममा थिए । अजय देवगन र आलिया भट्ट ‘आरआरआर’मा मात्र होइन ‘गंगुबाई कठैयाबाडी’मा पनि थिए ।

अझ ‘गंगुबाई कठैयाबाडी’ को कथा नै आलियामाथि केन्द्रित छ । यस्तोमा अजय देवगन भन्दा पनि आलिया तनावमा थिइन् । तर सोमबार मात्र ‘गंगुबाई कठैयाबाडी’ निर्माता तथा निर्देशक सञ्जयलीला भन्सालीले ‘गंगुबाई कठैयाबाडी’ जनवरीमा हैन फ्रेब्रुअरी १८ मा रिलिज गर्ने निर्णय सार्वजनिक गरेपछि आलिया भर्सेज आलियाको भिडन्त टरेको छ । भन्सालीले फिल्मको प्रदर्शन मिति परिवर्तन गरेकोमा निर्देशक राजामौलीले उनलाई र निर्माता जयन्तीलाल गाडालाई ट्वीटरमा धन्यवाद दिएका छन् ।