सीमाक्षेत्रमा घुसपैठ सुरक्षा चुनौती : सेना

काठमाडौं : उपत्यकाभित्र कोभिड-१९ को त्रास छ भने सीमाक्षेत्रमा घुसपैठको कारण सुरक्षा चुनौती रहेको व्रिफिङ पृतनापतिहरुले गरेका छन् । विप्लव समूहको कारण त्यसप्रकारको सुरक्षा चुनौती बढ्दै गएको पनि बताइएको छ । त्यसका लागि सेनाले आफ्नो भित्री रणनीतिलाई थप बलियो र सबल बनाउने पनि जनाएको छ ।
 
आइतबार प्रधानमन्त्री केपी ओलीले सम्बोधन गरेर आरम्भ भएको सेनाको नियमित ‘पृतनापति समन्वयात्मक’ बैठकमा उनीहरुले त्यस्तो धारणा राखेका हुन् । छलफलमा सेनाभित्र सुधार आएको धारणा पनि व्यक्त भएका थिए । सेनाभित्र घुसपैठ हुन नदिन सबै सजग रहनुपर्ने विषयलाई पनि एक-अर्का पृतना र अन्य सुरक्षा निकायसँगको समन्वयमा जोड दिने विषय उठेको छ । 

सेनाको वृत्ति विकास, प्राकृतिक प्रकोपमा उसको सक्रियताका लागि आवश्यक साधान र स्रोत लगायतको विषयमा पनि छलफल भएको छ । सेनाले सबै खाले चुनौतीलाई चिर्न आफ्नो संयन्त्रलाई पूर्ण रुपमा सक्रिय बनाएको पनि बताएको छ । रक्षामन्त्रीको जिम्मेवारीबाट ईश्वर पोखरेल मुक्त भएको एक साता नबित्दै नेपाली सेनाले पृतनापतिको भर्चुअल सम्मेलन गरेको हो । बैठक सेनाको नयाँ रणनीति तय गर्ने सहित मंगलबार सम्पन्न हुनेछ ।